Foto: Jumabekov Jaslan
Májilis depýtaty Ardaq Nazarov resmi otyrys kezinde anasyn týǵan kúnimen quttyqtaimyn dep synnyń astynda qaldy, dep habarlaidy Ult.kz.
Parlament otyrysynda saýalyn joldamas buryn, Nazarov 70 jasqa tolǵan anasyna júrekjardy tilegin jetkizdi.
– Qadirli anashym. Sizdi týǵan kúnińizben shyn júrekten quttyqtaimyn. Sizdiń meiirimge toly júregińizge jáne júzińizden tógilgen nurǵa shomylyp óstim. Áketaiym ekeýińiz qustyń qos qanatyndai máńgi birge bolyp, qudai bere salǵan nemerelerińizdiń qyzyǵyn kórińizder. Anashym, men sizdi jaqsy kóremin. Sizdiń aldyńyzda basymdy iemin, – dedi ol minberden.
Depýtattyń sózine áriptesteri qol soǵyp, qoldaý bildirgenimen, jeli qoldanýshylary bul qadamdy orynsyz dep baǵalap, teris pikirlerdi jaýdyryp jatyr. Keibir qoldanýshylar Nazarovty depýtattyq mandatynan aiyrýdy talap etti.
"Ardaq Nazarovty depýtattyq mandatynan aiyrýdy usynamyn", - degen bastama Threads áleýmettik jelisinde bes myńnan astam laik jinaǵan.
Bloger Býrahan Daqanov keibir depýtattar halyqtyń emes, belgili bir jerdiń, rýdyń depýtaty bolyp alatynyn atap ótti.
"Jalpy Májilis tórinde anasyn quttyqtap, Parlamentti Instagrammen shatastyryp alǵan Ardaq myrza laýazymyn asyra paidalanǵany úshin elektorattan, iaǵni halyqtan keshirim suraýy tiis. Májilis tóraǵasy depýtatqa qatań sógis jariialaidy dep úmittenemin. Bárimiz anadan týǵanbyz, biraq anadan da qasietti dúnie bar - ol Otan. Qazirgi kei depýtat óziniń belgili bir jerdiń, rýdyń, otbasynyń ǵana adamy emes, kúlli respýblikaǵa jaýapty adam ekenin sezinbeitin sekildi. Álemniń parlamentterin kórip, qyzyǵasyń kádimgidei. Kúnde bir tóbeles, qyrǵyn, jaǵa-jyrtys. Jalpy qabyldanatyn zańdar kádimgidei teketirestermen, ý-shýmen, dáiektermen qabyldanady. Ondai qyzyqpen qabyldanǵan zańdar naqty zań bolyp, uzaqqa shydary anyq. Jalpy bizde sondai Parlament bolsa, myna Ardaq myrza kóptegen jetistikterge jeter edi. Biraq bizdiń Parlament basqa, biz basqamyz. Onyń ústine bizdiń Májiliste minberde sóileýdiń ózi de mánerlep sóileýden ótetin jarys sekildi. Onyń ózi kózge qarap emes, tómen qarap, paraqtan oqylǵasyn kózge retsiz kórinip, qulaqqa da jaǵymsyz estiledi", - dep narazylyǵyn bildirdi Býrahan Daqanov.
"Talǵarda qylmys órship tur, keshe bireý taǵy adam óltirdi, urlap ketken balanyń jaǵdaiy anaý… al talǵarlyq depýtat Ardaq Nazarov sheshesin Parlamenttiń tórinen quttyqtaidy", - dep jazdy jýrnalist Naziia Joiamergen.
"Jariiada anany quttyqtaýdy biledi ekenbiz, úide analardy urmaýdy da bileiik. Sol depýtat otbasylyq zorlyq-zombylyq máselesin qolǵa alyp, nátije kórsetpeiinshe, bári beker, bári zaia", - dedi jýrnalist Ardaq Qultai.
Reglamentti buzǵany úshin depýtatqa qandai da bir shara qoldanyla ma, ol jaǵy ázirge belgisiz.
