Qazaqstan halqy Assambleiasynyń XXVIII sessiiasynda Nur-Sultan qalalyq sailaý komissiiasy daýys berý nátijesin jariialady, dep habarlaidy "Ult aqparat".
Belgili bolǵandai, daýys berýge qatysqan QHA músheleriniń jalpy sany - 351 adam.
Májilis depýtaty kandidattar úshin berilgen biýlletender: Saýytbek Abdrahmanov - 298, Avetik Amirhanian - 270, Ilias Býlarov - 274, Natalia Dementeva - 292, Iýrii Li - 282, Vakil Nabiev - 285, Shamil Osin - 271, Vladimir Tohtasýnov - 277, Abilfas Hamedov 290 daýysqa ie boldy.
Daýys berý nátijesinde QHA-nyń 9 kandidaty Parlament Májilisine ótti. Qazaqstan halqy Assambleiasynan sailanatyn QR Parlamenti Májilisi depýtattaryn sailaý qorytyndylaryn Ortalyq sailaý komissiiasy shyǵarady.
Aita keteiik, búgin Nur-Sultan qalasyndaǵy Beibitshilik jáne kelisim saraiynda Qazaqstan halqy Assambleiasynan usynylǵan Qazaqstan Respýblikasy Parlamenti Májilisiniń depýtattaryn sailaý boiynsha QHA-nyń XXVIII sessiiasy ótti. Sessiianyń airyqsha quqyǵy – Qazaqstan Respýblikasy Parlamenti Májilisiniń toǵyz depýtatyn sailaý.
Osy oraida «Qazaqstan Respýblikasyndaǵy sailaý týraly» QR Konstitýtsiialyq zańynyń 93-1-babyna sáikes sessiiada Assambleiadan sailanatyn QR Parlamenti Májilisiniń depýtattyǵyna QHA Keńesi usynǵan úmitkerlerge daýys berildi. Búgin túske deiin kandidattardy sailaý aiaqtaldy. Daýys berýge QR Tuńǵysh Prezidenti – Elbasy, Qazaqstan halqy Assambleiasynyń Tóraǵasy Nursultan Nazarbaev, QR Prezidenti Qasym-Jomart Toqaev jáne QHA músheleri qatysty.
Budan buryn habarlanǵandai, «Qazaqstan Respýblikasyndaǵy sailaý týraly» QR Konstitýtsiialyq Zańyna jáne «Qazaqstan halqy Assambleiasy týraly» QR Zańyna sáikes, 2020 jylǵy 11 jeltoqsanda Qazaqstan halqy Assambleiasy Keńesi QR Parlamenti Májilisiniń depýtattyǵyna Qazaqstan halqy Assambleiasynan sailanatyn 9 úmitkerdi usyndy.
