Parlament Májilisiniń jalpy otyrysynda «Qazaqstan Respýblikasynyń atqarýshylyq is júrgizý máseleleri boiynsha keibir zańnamalyq aktilerine ózgertýler men tolyqtyrýlar engizý týraly» zań jobasy ekinshi oqylymda maquldandy, dep habarlaidy QazAqparat.
Zań jobasy atqarýshylyq is júrgizý salasyndaǵy zańnamany jetildirýge jáne atqarýshylyq qujattardy májbúrlep oryndatý salasynda qalyptasyp otyrǵan qoǵamdyq qatynastardy retteýge baǵyttalǵan.
«Zań jobasyn ázirleý kezinde tiisti maqsattardy alǵa qoidyq. Birinshiden, qujattardyń oryndalý tiimdiligin, sapasy men ýaqytylyǵyn arttyrý. Ekinshiden, kemshilikterdi joiý ári atqarýshylyq is júrgizý taraptarynyń quqyqtaryn buzýǵa jol bermeý. Osyǵan orai salalyq zań men zańǵa táýeldi aktilerge keshendi taldaý júrgizdik», - dedi depýtat Asylbek Smaǵulov.
Zań jobasyn qabyldaý mynadai mindetterdi sheshýge múmkindik beredi: jeke sot oryndaýshylarynyń qyzmetin jetildirý jáne atqarýshylyq is júrgizýdiń tiimdiligin, atap aitqanda, sot oryndaýshysy qabyldaityn protsestik qujattardy, áreketterdi ońtailandyrý jáne osy áreketterdiń rettiligin aiqyndaý arqyly arttyrý; zamanaýi tehnologiialardy engizý, atqarýshylyq is júrgizý taraptary úshin májbúrlep oryndatý júiesiniń ashyqtyǵy men qoljetimdiligin arttyrý; jeke sot oryndaýshylarynyń tártiptik praktikasyn jetildirý; «Astana» halyqaralyq qarjy ortalyǵy» sot aktilerin atqarýshylyq qujattar tizbesine engizý; memlekettik eńbek inspektorlary jumys berýshilerdiń jalaqy tólemeý máseleleri boiynsha bergen uiǵarymdardyń tiimdi oryndalýyn qamtamasyz etý.
Joǵaryda kórsetilgen mindetterdi iske asyrý - sot oryndaýshylarynyń, onyń ishinde jeke sot oryndaýshylarynyń qyzmetin serpindi damytýdy qamtamasyz etýge, sondai-aq atqarýshylyq qujattardy májbúrlep oryndatýdyń tiimdiligin arttyrýǵa yqpal etedi. Bul óz kezeginde azamattardyń buzylǵan quqyqtarynyń tiimdi qorǵalýyn qamtamasyz etýge múmkindik beredi.
Eske sala keteiik, 2019 jyldyń naýryz aiynda ótken Májilistiń jalpy otyrysynda «Qazaqstan Respýblikasynyń atqarýshylyq is júrgizý máseleleri boiynsha keibir zańnamalyq aktilerine ózgertýler men tolyqtyrýlar engizý týraly» zań jobasy birinshi oqylymda maquldanǵan edi.
