Parlament Senatynyń jalpy otyrysynda «Qazaqstan Respýblikasynyń keibir zańnamalyq aktilerine aýdandyq, qalalyq jáne aýyldyq bilik deńgeileriniń derbestigi men jaýapkershiligin keńeitý máseleleri boiynsha ózgerister men tolyqtyrýlar engizý týraly» Zańy eki oqylymda qaralyp, qabyldandy, dep habarlaidy QazAqparat.
Zań jobasy Memleket basshysynyń «Cyndarly qoǵamdyq dialog – Qazaqstannyń turaqtylyǵy men órkendeýiniń negizi» atty Qazaqstan halqyna Joldaýyn iske asyrý maqsatynda ázirlendi.
Zań jobasynda birqatar normativtik quqyqtyq aktilerge ózgerister men tolyqtyrýlar engizý usynylady:
- aýdandyq mańyzy bar qalalardyń, aýyldardyń, kentterdiń jáne aýyldyq okrýgterdiń kiris bazasyn keńeitý;
- biýdjettik rásimderdi ońailatý;
- jergilikti ókildi jáne atqarýshy organdardyń derbestigin keńeitý jáne jaýapkershiligin kúsheitý;
- ákimshilik-aýmaqtyq birlikterge qoiylatyn talaptardy jetildirý.
«Negizgi normalarǵa toqtalsaq, jergilikti ózin-ózi basqarýdy damytý biýdjetiniń kiris kózderin ulǵaitý maqsatynda tórtinshi deńgeige qosymsha salyqtar men tólemderdiń 4 túrin berý usynylady.
Ekinshiden, biýdjettik rásimderdi ońailatý usynylady. Atap aitqanda, jiyrma paiyzdan aspaityn kólemde aýyldyq okrýg ákimi apparaty úshin biýdjetke túzetýler engizýdi kózdeý usynylady. Túzetý jergilikti qoǵamdastyq jinalysynyń kelisimi boiynsha júrgiziletin bolady.
Sondai-aq máslihattardyń sheshimderin ádilet organdarynda tirkeý qajettiligi boiynsha normany alyp tastap, biýdjetterdi bekitý rásimin ońailatý usynylady», - dedi QR Ulttyq ekonomika ministri Áset Erǵaliev.
Sonymen qatar, qarjy jyly kezeńinde aýdan jáne aýyldyq okrýg biýdjetteri arasyndaǵy jalpy sipattaǵy transfertter kóleminiń ózgerýine jol bermeitin Biýdjet kodeksine naqtylaýshy norma engiziledi.
«Ákimshilik-aýmaqtyq birlikter sanatyn ózgertý tártibin anyqtaýdy usynamyz. Qala mártebesin ózgertý bes jyl ishinde, al aýyldar úsh jyl ishinde osy Zańda belgilengen talaptarǵa sáikes kelmegen jaǵdaida júzege asyrylady. Iaǵni, jergilikti atqarýshy jáne ókildi organdar osy kezeńde eldi mekenderdiń odan ári keleshegin eskere otyryp, ekonomikalyq damýy úshin sharalar qabyldaýy tiis», - dedi ministr.
Budan bólek, máslihat pen onyń depýtattarynyń mártebesin arttyrý boiynsha birqatar túzetýler qarastyrylǵan.
«Máslihat sessiiasy tóraǵasynyń qyzmetin taratyp, onyń ókilettigin máslihat hatshysyna berý usynylady. Sonymen qatar, árbir oblys pen respýblikalyq mańyzy bar qalalarda máslihattardyń turaqty komissiia tóraǵalarynyń bosatylǵan eki laýazymyn engizý usynylady.
Bul rette turaqty negizde jumys isteitin turaqty komissiialardyń tóraǵalary bolyp ártúrli saiasi partiialardyń ókilderin sailaýdy usynady. Bul sharalar aimaqtardy saiasi básekelestikti yntalandyrýǵa áser etedi. Bul zań jobasy óńirlerdiń derbestigi men jaýapkershilik deńgeiin arttyrýǵa jáne jergilikti mańyzy bar máselelerdi neǵurlym jedel sheshý úshin biýdjettik rásimderdi aitarlyqtai jeńildetýge múmkindik beredi», - dedi Erǵaliev.
