Májilistiń jalpy otyrysynda palata depýtattary «Qazaqstan Respýblikasynyń keibir konstitýtsiialyq zańdaryna ózgerister men tolyqtyrýlar engizý týraly» QR Konstitýtsiialyq zań jobasyna Senat engizgen túzetýlerdi maquldady, dep habarlaidy ulysmedia.kz.
Zań jobasy boiynsha depýtat Arman Qojahmetov baiandama jasady.
«Bul Konstitýtsiialyq zań jobasy QR Úkimetiniń 2021 jylǵy 23 jeltoqsanyndaǵy qaýlysyna sáikes, Parlament Májilisine engizildi. Zań jobasyn biylǵy 19 qańtarda Májilis maquldap, qabyldanǵan eki pozitsiiamen Senatqa jiberdi. Senat bul túzetýlerdi biraýyzdan qabyldady. Alaida zań jobasyn Parlament Senatynda qaraý barysynda taǵy bir qosymsha túzetý engizildi. Atap aitqanda, Senat memlekettiń ishki jáne syrtqy saiasatynyń negizgi baǵyttary boiynsha ázirlenetin bastamalar QR Tuńǵysh Prezidenti-Elbasymen kelisýdi kózdeitin «Qazaqstan Respýblikasynyń Tuńǵysh Prezidenti-Elbasy týraly» Konstitýtsiialyq Zańnyń 1-baby 6-bóligin alyp tastaýdy usyndy. Qoryta kelgende, «Qazaqstan Respýblikasynyń keibir konstitýtsiialyq zańdaryna ózgerister men tolyqtyrýlar engizý týraly» QR Konstitýtsiialyq zań jobasyna Senaty engizgen ózgerispen kelisýdi suraimyn», - dedi ol.
Qujatty qaraý kezinde Májilis depýtattary bul usynysqa qoldaý bildirdi.
Budan buryn habarlanǵandai, jaqynda depýtattar «Qaýipsizdik Keńesi týraly» jáne «Qazaqstan halqy Assambleiasy týraly» Zańdarǵa buryn usynylǵan ózgerister men tolyqtyrýlardy talqylady. Túzetýlerde Elbasynyń Qaýipsizdik Keńesinde jáne Qazaqstan halqy Assambleiasyna ómir boiy tóraǵalyq etý quqyǵynyń kúshin joiý kózdelgen. Joǵarǵy Palata depýtattary májilismenderdiń buryn aitylǵan barlyq ózgeristerin maquldady.
Sonymen qatar qujatty talqylaý barysynda Senatta bir norma engizildi. Ol – «Tuńǵysh Prezident týraly» zańnan memlekettiń ishki jáne syrtqy saiasatyna bailanysty bastamalardy Elbasymen kelisilýge tiis degen norma alyp tastalyp otyr. Sondyqtan da 27 qańtarda Senat zańnamaǵa engizilgen ózgeristerdi tujyrymdamaly túrde qoldap, bir ózgerispenen Májiliske qaitarǵan edi.
