Depýtattar Qazaqstandaǵy aýyldardy aralaidy. Bul týraly Májilis tóraǵasy Nurlan Nyǵmatýlin málim etti, dep habarlaidy QazAqparat.
«Búgin depýtattyq korpýs sailaýshylarmen kezdesý úshin aimaqtarǵa shyǵatyn bolady. Bizdiń eń negizgi maqsatymyz - Prezidenttiń bes áleýmettik bastamasyn jáne onyń erekshe múmkindikterin árbir azamatqa, ár otbasyna jetkizý. Sonymen birge, zań jaǵynan qamtamasyz etý jumystarymyzdy jan-jaqty túsindirý áske asyrylady», - dedi Nurlan Nyǵmatýlin Májilistiń jalpy otyrysynda.
Belgili bolǵandai, 6 sáýirge deiingi aralyqta depýtattar óńirlerde bolady.
Májilis tóraǵasynyń sózine qaraǵanda, halyq qalaýlylary kezdesýlerdi oblys ortalyqtary men iri qalalardan bólek, shalǵaidaǵy aýyldarda, eldi mekenderde de ótkizedi.
«Óńirlerden oralǵannan keiin, biz áleýmettik bastamalardy júzege asyrýǵa baǵyttalǵan zań jobalarymen jumysty bastaimyz. Osy oraida atqarylatyn sharalar aýqymdy bolady», -dedi ol.
