Foto: ashyq derekkóz
Depýttattar parlamenttiń segizinshi shaqyrylymynyń úshinshi sessiiasyn aiaqtap, kanikýlǵa ketti, dep habarlaidy Ult.kz.
Parlamenttiń qos palatasynyń birlesken otyrysynda májilis tóraǵasy Erlan Qoshanov depýtattardyń jumysyn qorytyndylady. Onyń aitýynsha, depýtattar zań men tártip ústemdigin ornatý baǵytynda júieli jumys júrgizip, prezidenttiń zań men tártip – memlekettik qurylystyń basty qaǵidatyn sessiia boiy berik ustandy.
"Osy jyldary depýtattar udaiy prezidenttik reformalardyń alǵy shebinen kórindi. Biz árdaiym memleket basshysynyń jan-jaqty oilastyrylǵan, halyqtyń talap-tilegine, eldiń múddesine negizdelgen strategiiasyn basshylyqqa alyp kelemiz. Bul ustanym baǵyt-baǵdarymyzdy aiqyndap, kúsh-qýatymyzdy bir arnaǵa jumyldyrýǵa jol ashty. Parlamenttiń kúndelikti jumysy eń áýeli osy reformalar mazmunyn odan ári baiytyp, naqty ispen qoldaýǵa baǵyttalǵan. Sessiia bastalarda memleket basshysy óz joldaýynda alǵa qoiǵan basty mindetter bizdiń jumysymyzǵa serpin berip, qarqyn qosty. Ulttyq quryltaida aitylǵan strategiialyq ideialar parlament nazaryn qoǵamnyń eń ózekti máselelerine aýdardy. Prezidenttiń sailaýaldy baǵdarlamasy aiasyndaǵy zańnamalyq bastamalardyń bárin derlik depýtattyq korpýs osy sessiiada iske asyrdy", – dedi Qoshanov.
Sessiia barysynda parlament qaraýynda 158 zań jobasy bolsa, onyń ishinde 89 zań qabyldanǵan. Olardyń ishinde – amnistiia týraly zań, mindetti áleýmettik meditsinalyq saqtandyrý týraly zań, Qylmystyq kodekske, sondai-aq Salyq, Biýdjet jáne Sý kodeksterine engizilgen túzetýler bar.
"Endi palata músheleri zań jobalaryn qarap qana qoimai, buryn qabyldanǵan zańdar jergilikti jerlerde qalai júzege asyp jatqanyn da zerttep-zerdeleidi", – dedi májilis tóraǵasy.
Kelesi sessiiada depýtattar Qurylys kodeksi, quqyqbuzýshylyqtardyń aldyn alý, tutynýshylardyń quqyqtaryn qorǵaý, bankter men bank qyzmeti týraly jáne basqa da zań jobalaryn qaraýǵa tiis.
Kanikýl kezinde depýtattar óńirlerge baryp, sailaýshylarmen kezdesýler ótkizedi.
