Sýret: Orda.kz
Búgin Parlament palatalarynyń birlesken otyrysy ótip, onda segizinshi sailanǵan Parlamenttiń ekinshi sessiiasy resmi túrde jabyldy.
Bul turǵyda depýtattar biylǵy 1 qyrkúiekke deiin parlamenttik kanikýl dep jariialanatyny týraly arnaiy qaýly qabyldady.
"Búgin biz segizinshi sailanǵan Qazaqstan Parlamentiniń ekinshi sessiiasynyń jumysyn aiaqtaǵaly otyrmyz. Dástúr boiynsha atqarylǵan jumysty qorytyndylaimyz, keleshekke jospar quramyz. Memleket basshysy Qasym-Jomart Kemeluly Toqaevtyń saiasi reformalary Parlament jumysyna jańa baǵyt-baǵdar berdi. Kóppartiialy Parlament zań shyǵarýshy organnyń qyzmetine tyń serpin ákeldi, qoǵamnyń túrli ideologiialyq kózqarastaǵy áralýan ókilderiniń kelýi qabyldanatyn zańdardyń sapasyn arttyra tústi. Munyń bári — Qazaqstan parlamentarizmi tarihyndaǵy jańa kezeńge ainaldy", — dedi Májilis tóraǵasy Erlan Qoshanov.
Onyń aitýynsha, ótken sessiia «Kúshti Prezident — yqpaldy Parlament — esep beretin Úkimet» formýlasynyń tiimdiligin is júzinde dáleldedi. Bilik tarmaqtarynyń tepe-teńdigin qamtamasyz etetin bul júie pármendi sheshimder qabyldaýǵa múmkindik týǵyzdy.
"Osynyń bári elimizdi odan ári damytýǵa, halyqtyń ál-aýqatyn arttyrýǵa baǵyttalǵan. Prezident jariialaǵan «zań men tártip ústemdigi qaǵidaty» ótken zań shyǵarý maýsymynda basty baǵdar boldy, qoǵamnyń sapaly zańdar qabyldaýǵa degen suranysyn arttyra tústi. Parlament elimizdegi eń ózekti problemalar boiynsha zańnamalyq sheshimder shyǵarý jáne olardy ashyq talqylaý alańyna ainaldy. Túitkildi máselelerdi zańdar arqyly sheshý negizgi tetik retinde qalyptasyp keledi. Normativtik qujattardyń mártebesi men salmaǵy artyp otyr. Munyń bári — pármendi ári yqpaldy Parlament qalyptastyrý baǵytyndaǵy konstitýtsiialyq reformanyń mán-mańyzyn aishyqtai túsýde", — dedi Májilis tóraǵasy.
Bul turǵyda E. Qoshanov osy sessiiada Parlamenttik jumys kezeńi tolyq ári tabysty atqarylǵanyn aitty.
"Memleket basshysynyń jyldaǵy Joldaýlaryn, Prezidenttik Sailaýaldy baǵdarlamasyn, Ulttyq quryltaida qabyldanǵan sheshimderdi iske asyrý depýtattyq korpýs qyzmetiniń negizgi ózegine ainaldy. Osyǵan bailanysty ekinshi sessiianyń zańnamalyq kúntártibi de mazmundy boldy. Palatalardyń 5 birlesken otyrysy, Májilistiń 39 otyrysy jáne Senattyń 43 otyrysy ótti. Sessiia barysynda eki palatanyń qaraýynda 179 zań jobasy boldy, onyń 120-si qabyldandy. Sessiia barysynda depýtattar birqatar mańyzdy zań jobalary boiynsha Úkimetpen birlese jumys istedi", - dedi ol.
