Senat «1994 jylǵy 10 jeltoqsandaǵy Qazaqstan Respýblikasynyń Úkimeti men Resei Federatsiiasynyń Úkimeti arasyndaǵy «Baiqońyr» keshenin jalǵa berý shartyna ózgeris engizý týraly hattamany ratifikatsiialaý týraly» zań jobasyn qabyldady. Ol Resei tarapyna ǵarysh ailaǵyn jalǵa berýdi 2050 jylǵa deiin uzartýǵa múmkindik beredi, - dep habarlaidy "Ult aqparat".
"Baiqońyr" keshenin jalǵa berý shartynyń 4-babyna túzetýler engizý bóliginde hattamany ratifikatsiialaý týraly zań jobasy "Baiqońyr" keshenin jalǵa alý men paidalanýdy 2050 jylǵa deiin uzartýǵa múmkindik beredi", - delingen senattyń Halyqaralyq qatynastar, qorǵanys jáne qaýipsizdik komitetiniń qorytyndysynda.
Zań jobasyn Senat ókilderine Tsifrlyq damý, innovatsiialar jáne aeroǵarysh ónerkásibi ministri Baǵdat Mýsin tanystyrdy. Vedomstvo basshysy 1994 jyly Qazaqstannyń «Baiqońyr» ǵarysh ailaǵyn ustaýǵa jáne paidalanýǵa múmkindigi bolmaǵanyn eske aldy.
«Baiqońyr» ǵarysh ailaǵy búgingi tańda oidaǵydai jumys istep tur. Keshendi paidalanǵany úshin respýblikalyq biýdjetke jyl saiyn 115 mln AQSh dollary shamasynda qarajat túsedi. Keshen jalda bolǵan 27 ishinde respýblikalyq biýdjetke shamamen 3,1 mlrd dollar túsken. Taraptardyń ózara múddelerin eskere otyryp, 2004 jyly «Baiqońyr» keshenin jalǵa alý merzimi 2050 jylǵa deiin uzartyldy» - dedi ministr.
Sondai-aq, ol 2020 jyly Baiqońyr qalasyn damytýdyń uzaq merzimdi baǵdarlamasy iske asyp jatqanyn atady. Osy baǵdarlamanyń arqasynda Baiqońyr turǵyndary úshin gaz tarifi 16 ese arzandaǵan.
«1994 jylǵy 10 jeltoqsandaǵy Qazaqstan Respýblikasynyń Úkimeti men Resei Federatsiiasynyń Úkimeti arasyndaǵy «Baiqońyr» keshenin jalǵa berý shartyna ózgeris engizý týraly hattamaǵa 2018 jyly Petropavl qalasynda qol qoiyldy. Qazaqstan Respýblikasynyń zańyn qabyldaý respýblikalyq biýdjetten túsetin kiristerdiń qysqarýyna nemese shyǵystardyń ulǵaiýyna ákep soqpaidy. Resei tarapy osy hattamanyń kúshine enýi boiynsha memleketishilik rásimderdi oryndady», - degen Baǵdat Mýsin depýtattardan zań jobasyn qoldaýdy surady.
Daýys berý nátijesinde zań jobasyn qabyldaý týraly sheshim qabyldandy.
Hattamany ratifikatsiialaý nátijesinde "Baiqońyr" kesheniniń ǵylymi-tehnikalyq, óndiristik, áleýmettik-mádeni áleýetin saqtaýǵa, tiimdi paidalanýǵa jáne damytýǵa múmkindik beretin buryn qabyldanǵan mindettemelerdi úilestirý kútiledi dep kórsetilgen. Sonymen qatar, aimaqtaǵy áleýmettik-ekonomikalyq turaqtylyqty qamtamasyz etý kózdelgen.
