Parlament «Qazaqstan Respýblikasynyń keibir zańnamalyq aktilerine Memleket basshysynyń 2020 jylǵy 1 qyrkúiektegi «Jańa jaǵdaidaǵy Qazaqstan: is-qimyl kezeńi» atty Qazaqstan halqyna Joldaýynyń jekelegen erejelerin iske asyrý máselesi boiynsha ózgerister men tolyqtyrýlar engizý týraly» Zańyn qabyldady, dep habarlaidy QazAqparat.
Aita keteiik, 10 jeltoqsan kúni Senattyń jalpy otyrysynda qujat ekinshi oqylymda talqylandy. Qujatqa tolyqtyrýlar engizilgendikten, zań jobasy Májiliske qaitaryldy.
Búgin Parlament Májilisiniń jalpy otyrysynda palata depýtattary Senat engizgen tolyqtyrýlarmen kelisti.
«Májilistiń Zańnama jáne sot-quqyqtyq reforma komiteti zań jobasyna Senat engizgen tolyqtyrýlardy qarap shyqty. Senat usynǵan tolyqtyrýlar zań jobasynyń tujyrymdamalyq erejelerin ózgertpeidi jáne QR Konstitýtsiiasynyń 61-babynyń 5-tarmaǵyna sáikes, komitet QR Parlamenti Senaty engizgen tolyqtyrýlarmen kelisýdi usynady», - dedi Májilis depýtaty Snejanna Imasheva.
Eske sala keteiik, zań jobasyn talqylaý barysynda Senat depýtattarynyń eskertýleri men usynystaryn eskere otyryp, Májilis maquldaǵan zań jobasyna tolyqtyrýlar engizý qajettigi týyndady. Máselen, QR Qylmystyq-protsestik kodeksine kámeletke tolmaǵandardyń jynystyq tiispeýshiligine qarsy asa aýyr qylmys boiynsha sotta isterdi qaraýdy alqabilerdiń qatysýynsyz sýdianyń jeke-dara júzege asyrýyn kózdeitin túzetýler engizý usynyldy.
«Qujatty ekinshi oqylymǵa daiyndaý kezinde zań jobasyna tolyqtyrýlar engizý qajet boldy. Memleket basshysynyń Joldaýynda kámeletke tolmaǵandarǵa qatysty jynystyq sipattaǵy qlymystar úshin jazany kúsheitý mindeti kórsetilgen. Túzetýler osy sanattaǵy isterdi kásibi sýdialardyń jalǵyz qaraýyn kózdeidi», - dedi senator Qanatbek Safinov.
