Senattyń jalpy otyrysynda «Áriptestik týraly negizdemelik kelisimdi (2014 jylǵy 4 mamyrdaǵy QR Úkimeti men Aziia Damý Banki arasyndaǵy Qazaqstan Respýblikasyn ekonomikalyq ártaraptandyrý jáne onyń ornyqty damýyna, jalpy ósýine járdemdesý maqsatynda yntymaqtastyqty kúsheitý jónindegi áriptestik týraly negizdemelik kelisimge túzetýler men tolyqtyrýlar) ratifikatsiialaý týraly» Zańy qabyldandy, dep habarlaidy QazAqparat.
Kelisim 2019 jylǵy 27 tamyzda Nur-Sultan qalasynda bekitilgen.
«Kelisim memlekettik kepildikpen qaryz alý kezinde Aziia Damý Bankiniń erejeleri men talaptaryn saqtaý boiynsha normalardy belgileidi. Olar sybailas jemqorlyqqa qarsy kúres, taýarlardy, jumystar men qyzmetterdi satyp alý, ekologiialyq jáne áleýmettik qorǵaý sharalary, negizgi eńbek standarttary, tólemder, aqparatty ashý, sondai-aq genderlik damý boiynsha erejeler men talaptardy qamtidy. Bul sharttardy memlekettik kepildikpen alynǵan qaryzdarda qoldaný - jobalardyń qarjylandyrý tetikterin keńeitýge múmkindik beredi», - dedi Ulttyq ekonomika ministri Rýslan Dálenov.
Onyń sózine qaraǵanda, kelisimge sáikes yntymaqtastyqtyń negizgi maqsattary men baǵyttary makroekonomikalyq ornyqtylyqty arttyrý, infraqurylym men kommýnaldyq qyzmetterdi jańǵyrtý, aýyl sharýashylyǵy sektoryn damytýǵa járdemdesý, shaǵyn jáne orta biznesti qarjylandyrýǵa qoljetimdilikti jaqsartý, infraqurylymǵa ári densaýlyq saqtaý men bilim berý siiaqty áleýmettik sektorlarǵa investitsiialardy ulǵaitý bolyp otyr.
«Aziia Damý Bankiniń qyzmeti jumys oryndaryn qurý, innovatsiialardy yntalandyrý, áleýetti ulǵaitý, bilim men úzdik halyqaralyq praktikalardy engizý negizinde keń aýqymdy qoldaý kórsetý arqyly ekonomikalyq damýǵa óz úlesin qosyp otyr. Kelisimdi ratifikatsiialaý teris áleýmettik-ekonomikalyq jáne quqyqtyq saldarǵa ákep soqtyrmaidy, sondai-aq respýblikalyq biýdjetten qosymsha qarajatty talap etpeidi», - dedi vedomstvo basshysy.
