Foto: UOK
Parij Olimpiadasynyń bastalýyna da sanaýly kúnder qaldy. Biylǵy dúbirli dodanyń erekshelikteriniń biri alǵash ret breik-dans boiynsha jarys ótedi jáne sol dodaǵa kók bairaqty kóterip, qazaqstandyq sportshy Ámir Zákirov qatysady.
Qazaqstandyq breikdanserdiń jetistigi dúiim jurtty qýanyshqa bólep, Olimpiada oiyndarynyń jańa baǵytynda jańa lep bergendei boldy.
Ámir joldamany qalai aldy?
Majarstan astanasy Býdapeshte ótken irikteý týrnirinde Zákirov jarystyń finalyna deiin jetip, aqtyq synda Niderlandyq sportshyǵa ese jiberdi. Osylaisha, ekinshi oryn aldy. Úshinshi oryndy Ońtústik Koreia sportshysy ielendi.
Eki irikteý kezeńiniń qorytyndysy boiynsha Ámir 71 upai jinady (Shanhaidaǵy jarysta ol 15-oryn alǵan). Jalpy esepte qazaqstandyq B-Boy Amir (Ámirdiń sporttaǵy laqap aty, red.) altynshy orynǵa jaiǵasty. Bul nátije oǵan Olimpiada joldamasyn alýǵa múmkindik berdi.
"Bul Ámirdiń osy deńgeidegi týrnirlerdegi alǵashqy jáne sońǵy jeńisi emes. Ony jáne barlyq qazaqstandyqtardy osy jetistikterimen quttyqtaimyn, sondai-aq chempionymyzǵa qarqynyn báseńdetpeýin jáne Qazaqstandy 2024 jyly ótetin Olimpiada oiyndarynda laiyqty óner kórsetýin tileimin. Olimpiada breik-dans resmi sport túrleriniń biri bolady", - dep jazdy burynǵy QR Mádeniet jáne sport ministri Ashat Oralov Facebook paraqshasynda.
B-Boy Amir-dyń ózi breikingtiń Olimpiada oiyndaryna kirýi osy sport túrinde jańa serpilis ákeledi dep senedi.
"Meniń oiymsha, jańa tolqyn bolady jáne ol bizge bailanysty. Men óz kózqarasym men deńgeiimdi kórsetý úshin Olimpiadaǵa qatysýǵa tyrysamyn", -degen edi 2021 jyly bergen suhbatynda.
Ámirdiń maqsaty oryndalýǵa taiap qaldy.
Foto: redbull.com
Petropavl kóshesinen Olimpiada alańyna deiin
Ámir Zákirov breik-danspen mektep qabyrǵasynda júrgende ainalysa bastaǵan. Ol kezde onyń týǵan qalasy Petropavlda breik-danstan arnaiy úiirme bolmaǵan eken. Sondyqtan ol kóshede jattyqqan.
Keiinirek, qalada breik-danstan úiirme ashylyp, Zákirov te úzbei úiirmege baryp júrgen. Biraq qarajattyń tapshylyǵynan úiirmeniń aqshasyn tóleý Ámirge qiynǵa soqqan eken. Sebebi onyń otbasy óte qarapaiym turmystaǵy adamdar. Ata-anasy ajyrasqan, ákesi ishkilikke salynǵan kórinedi. Sodan, jas bishiniń talpynysy men qabiletin kórgen jattyqtyrýshy oǵan jattyǵýǵa tegin kelýge ruqsat beripti.
Shyny kerek, breik-dans Olimpiada oiyndarynyń quramyna kirgenge deiin jalpy jurtshylyq muny jai ǵana jekelegen adamdardyń qyzyǵýshylyǵy, ermegi retinde qabyldap keldi. Jerde urshyqsha úiirilip bileitin jastardy kórgende tańqalyp jatatynymyz ras, biraq salmaǵy aýyr sport túri ekenin kópshilik bile bermedi.
"Breikingpen ainalysý úshin kóp eńbek kerek"
Ámirdiń ózi keiingi suhbattarynyń birinde Keńes Odaǵynda bári breikingpen, tipti breik-danspen ainalysqan, biraq keiin tastap ketti, sebebi bul fizikalyq turǵyda qiyn, -degen.
"Adamdar jattyǵýǵa barǵanda belgili bir elementterdi qalai jasaý kerektigin tez úirenemin dep oilaidy, biraq kóp uzamai kóp eńbek kerek ekenin túsinedi. Másele mynada, qazir adamdarda breiking týraly túsinik áli de Keńes dáýirindegidei. Jańalyqtarda breiking týraly aitqanda, birden elektrik-býgi bilep jatqan "Kýrer" filmin kórsetedi. Filmde "Joǵarǵy úzilis", "tómengi úzilis" sózderin qoldanady. Munyń bári breikingte joq. Jastar qazir breikingke barmaidy, óitkeni ol qazirgi zamanǵa sai emes, trendte emes. Men bulai emes ekenin kórsetkim keledi, bi-boilar zamanaýi kiinip, zamanaýi mýzykany tyńdaidy", -dedi Ámir Zákirov.
Mektep bitirgesin Zákirov Reseidiń Omby qalasyna kóship, onda ol breik-danstan jattyqtyrýshy bolady jáne sahnaǵa shyǵyp júredi. 2016 jyly Zákirov ombylyq Anastasiia Chetvergovamen birge Reseidiń TNT arnasyndaǵy "Tantsy" shoýynda irikteýden ótedi. Biraq kóp uzamai olar jarystan shyǵyp qalady.
Foto: superomsk.ru
Jiyrma jasynda B-Boy Amir Máskeýge kóship keldi. Sodan keiin ony reseilik breiking - Predatorz komandasyna shaqyrady. Qazaqstandyq bi-boi Reseide júrip túrli baiqaýlarǵa qatysyp, sahnalarada óner kórsetedi.
Kóp uzamai Ámir Zákirov Qazaqstanǵa oralyp, elimizdiń atyn breikingtan álem, Eýropa chempionattarynda tanytyp júrdi.
"Men búkil álemge bizdiń mádenietimiz týraly aitqym keledi"
Onyń breikingtegi tanymaldyǵy 2020 jyly Chehiia astanasy Praga qalasynda ótken Legits Blast jeke saiysynda shyqty. Sosyn, 2021 jyly Unbreakable jáne Red Bull BC One Cypher Kazakhstan baiqaýlarynda top jardy.
Ámir 2022 jyly Niý-Iorkte ótken Red Bull BC One breikinginen álemdik týrnirdiń (týrnirdiń sol kezdegi chempiony, red.) resmi promo-videosynyń negizgi keiipkeri, rejisseri jáne avtory boldy. Ol óz suhbatynda:
"Men búkil álemge bizdiń mádenietimiz týraly, men ósken jer týraly aitqym keldi. Biraq ony zamanaýi jáne standartty emes etip jasaǵym keldi. Qazir álemdik breiking arenasynda Qazaqstanǵa kóp nazar aýdarylyp otyr. Bizdiń bólise alatyn jáne kórsete alatyn kóp dúniemiz bar", -dedi B-Boy Amir.
Promo-videoda Ámir kiizúidiń ishinde bileitin kórinister bar. Videoda qazaqtyń ulttyq arnamentteri, mádenieti kórsetilgen jáne zamanaýi kórinistermen ádemi ushtasqan deýge bolady.
Foto:redbull.com
Aita keteiik, biyl Olimpiadaǵa Qazaqstannan sporttyń 25 túrinen 80 sportshy el namysyn qorǵaidy. Solardyń biri 26 jastaǵy Ámir Zákirov bolyp otyr.
2020 jyly breiking resmi túrde olimpiadalyq sport túriniń tizimine endi. Parij-2024 Olimpiadasynda tarihta alǵash ret breik-dans boiynsha jarys ótedi.
