Tokioda ótip jatqan Paralimpiada oiyndarynda Qazaqstan komandasy alǵashqy "altynyn" ielendi, dep habarlaidy "Ult aqparat" Olympic.kz-ke silteme jasap.
Paýerliftingten erler arasynda 54 kelige deiingi salmaqta synǵa túsken David Degtiarev Paralimpiada chempiony atandy.
Ol óziniń úzdik nátijesinde 174 kelini kóterip, altyn medal jeńip aldy.
Bul salmaqta frantsýz Býrlon Aksel (165 kg) «kúmis» júldege ie bolsa, «qola» júlde grek Bakochristos Dimitrioske (165 kg) buiyrdy.
Osylaisha, Qazaqstan quramasy Paralimpiada oiyndary aiasynda birinshi marapatqa ie boldy.
David Degtiarev 1996 jyly Aqmola oblysynyń Atbasar qalasynda dúniege kelgen. Ol para paýerliftingpen 2016 jyldan beri ainalysqan. Jeke jattyqtyrýshysy - Kolesnikov Iýrii Nikolaevich. 2021 jyly Tbliside ótken Álem Kýboginde 185 kg-ǵa deiin salmaq kóterip, Aziia rekordshysy boldy.
Aita ketsek, Qazaqstan tarapynan 26 parasportshy 7 sport túri boiynsha qatysyp, el namysyn qorǵaidy. Paralimpiada oiyndary 2021 jyldyń 24 tamyzynan – 5 qyrkúiek aralyǵynda Tokioda ótip jatyr.
