Para bergeni jáne paraqorlyqqa deldal bolǵany úshin aiyppul mólsheri birneshe esege ósti. Bul týraly «Antikor ortalygy» alańynda ótken brifingte Nur-Sultan qalasy boiynsha sybailas jemqorlyqqa qarsy is-qimyl departamentiniń basshysy Shyńǵys Qabdýla aitty, dep habarlaidy QazAqparat.
«Azamattar sybailas jemqorlyqpen kúrestiń aýyrlyǵyn túsinýi kerek. Kúsheitilgen sanktsiialar qosymsha tejeýshi faktor bolady dep úmittenemiz. Para berýshiler de, para alýshylar da qatań jazalanatyn bolady. Paraqorlyqqa deldaldyq jasaǵany úshin birneshe ret, ne qylmystyq toppen nemese óziniń qyzmet babyn paidalana otyryp jasaǵan adamdarǵa da osyndai, qaýipsizdigi tómen qonys-koloniiasynda jazany birden óteýdiń múmkin emestigi jáne shartty túrde merziminen buryn bosatýǵa tyiym salý túrindegi qatań sharalar qoldanylatyn bolady», - deidi Nur-Sultan qalasy boiynsha sybailas jemqorlyqqa qarsy is-qimyl departamentiniń basshysy.
Onyń aitýynsha, bas bostandyǵynan aiyrý merzimderiniń ulǵaiýynan basqa, para bergeni jáne paraqorlyqqa deldal bolǵany úshin aiyppul mólsheri de birneshe esege ósti.
«Endi qarapaiym para berýshiler úshin (50 AEK deiin) aiyppuldyń eń tómengi mólsheri 2 esege, paranyń 10 eselengen mólsherinen 20 eselengen mólsherine deiin ulǵaityldy. Mysaly, eger adam 100 myń teńge para bergeni úshin sottalǵan bolsa, onda oǵan eń tómengi aiyppul retinde sotpen taǵaiyndalǵan aiyppul mólsheri 2 mln teńgeni quraidy. Osyǵan deiin, eń tómengi aiyppul mólsheri 1 mln teńgeni qurady. Sol siiaqty deldaldar úshin de aiyppuldyń mólsheri 2 esege ulǵaityldy. Búgingi alańdy paidalana otyryp, taǵy da azamattardy zańsyz syiaqy tóleý arqyly máselelerdi sheshýden bas tartýǵa shaqyramyn. Bul úshin qatań qylmystyq sanktsiialar qarastyrylǵan», - dep atap ótti Shyńǵys Qabdýla.
