Shyǵys Qazaqstan oblysy Borodýliha aýdany ákiminiń burynǵy orynbasary para alǵany úshin túrmege qamaldy, dep habarlaidy QazAqparat.
Aýdandyq sot baspasóz qyzmetiniń málimetine súiensek, Borodýliha aýdany ákiminiń orynbasary qyzmetin atqarǵan sottalýshy osy jyldyń naýryz-shilde ailary aralyǵynda kólik joldaryn jóndeýge qosymsha kelisimder jasasý kezinde JShS basshysyna kómek kórsetemin dep 1 800 000 teńge para alǵan. Sot barysynda onyń kinási kýágerler sózimen jáne jasalǵan kelisim shart syndy qujattarmen dáleldendi.
«Aiyptalýshy óz sózinde kinásin moiyndap, jeńil jaza taǵaiyndaýdy surady. Sot úkimimen ol 3 jyl merzimge túrmege qamaldy. Sonymen qatar aýdan ákiminiń burynǵy orynbasary memlekettik qyzmette jumys isteý quqyǵynan ómir boiyna aiyrylǵan», - delingen aqparatta.
Aita keteiik, úkim áli zańdy kúshine engen joq.
