Aýǵan qarsylasý qozǵalysy men tálipterge qarsy kóterilisshiler Panjir shatqalynyń Hendj aýdanyna jinalyp jatyr. 31 tamyz 2021 jyl.
Tálipter men Aýǵanstanda "Taliban" qozǵalysynyń biligine moiynsunbaǵan Panjsher shatqalyndaǵy qarsylasý kúshteri aýǵandarǵa úndeý jasady, dep habarlaidy Azattyq.
Tálipter ókili áleýmettik jelide "soǵystyń aldyn alyp, saiasi sheshim tabýǵa tyrysyp jatqany" jaily aýdiohabar taratty. Al, Panjsher shatqalyndaǵy qarsylasý kúshteriniń ókili "Panjsher shatqalyn qorǵaý jalǵasatyny" týraly videoúndeý tastady.
AQSh pen onyń odaqtastary Aýǵanstandaǵy azamattaryn jáne ózderimen yntymaqtasqan aýǵan azamattaryn evakaýtsiialaýdy 31 tamyzda aiaqtaǵannan keiin Aýǵanstannyń myńdaǵan beibit adamy elden shyǵyp ketý úshin shekara mańyna baryp jatyr.
Ulybritaniia Syrtqy ister ministri Dominik Raab shetel ister boiynsha parlament komitetiniń shuǵyl otyrysynan keiin, barlaý málimetterine súienip Kabýl biyl "qulamaitynyn", óziniń osy aimaqqa baryp Aýǵanstannan adamdardy evakýatsiialaýdy jalǵastyrý týraly máseleni talqylaýǵa kúsh salatynyn málimdedi.
Sársenbi kúni Aq úi AQSh-tyń áskeri bazasyna Aýǵanstannan shyqqan 50 myń bosqyndy ornalastyratynyn habarlady.
AQSh memleketttik hatshysynyń orynbasary Viktoriia Nýlandtyń sózinshe, AQSh Aýǵanstanda qalǵan azamattaryn alyp shyǵýdyń barlyq joldaryn oilastyrady. Onyń aitýyna qaraǵanda, ázirge Vashington tálipter úkimetin moiyndamaidy, biraq AQSh pen onyń odaqtastarynyń múddesine sai kelse táliptermen kelissóz jasaidy. Nýlandtyń sózinshe, Qurama Shtattar Aýǵanstanǵa gýmanitarlyq kómek berý joldaryn qarastyrady, biraq ol tálipter qolyna túspeýi tiis.
"Eń bastysy olardyń BUU Jarǵysyna sai moiyndaryna alǵan mindettemeleri men Aýǵanstan adam quqyǵyn qurmetteitin elge ainalatyny jaily ýádelerin qalai oryndaitynyn, halyqaralyq quqyqty qalai syilaitynyn, shetel azamattary men Aýǵanstannannan ketkisi keletin aýǵandarǵa kedergi jasamaitynyn kórgimiz keledi", – deidi Nýland.
Tálipter ázirge jańa úkimet quramyn jariialamady jáne eldi qalai basqaratyny jaily josparlaryn ashqan joq. Jaǵdaidy baqylap otyrǵandardyń sózinshe, "Taliban" jetekshileri halyqaralyq qaýymdastyqty 1996-2001 jyldar bilik qurǵan tálipterdiń radikalizminen bas tartqanyna sendirgisi keledi. Biraq Aýǵanstannyń ár aimaǵynda tálipter qarsylastaryn qatań jazaǵa tartyp jatqany jaily aqparattar túsip jatyr.
