Prezidenttik kadrlyq rezerv forýmy aiasynda áleýmettik damý máselelerine arnalǵan «Adami kapital» sessiiasy ótti, dep habarlaidy QazAqparat.
Sessiiaǵa QR Premer-Ministriniń orynbasary Eraly Toǵjanov, QR Aqparat jáne qoǵamdyq damý ministri Aida Balaeva, Bilim jáne ǵylym ministri Ashat Aimaǵambetov jáne Mádeniet jáne sport ministri Aqtoty Raiymqulova qatysty.
Eraly Toǵjanov óz sózinde pandemiianyń Qazaqstandaǵy qoǵamǵa qalai yqpal etkenin aitty.
«Ár qiyndyqtyń bir artyqshylyǵy bolady. Pandemiia arqyly sana-sezimimizde tóńkeris boldy. Talai dúnieniń tezirek damýyna yqpal etti, máselelerdi qysqa merzimde sheshý qajet boldy. Mysaly pandemiia bolmaǵanda, kompiýtermen qamtamasyz etý máseleleri taǵy 5 jylǵa sozylar ma edi. Óz elimizde kompiýter, noýtbýk qurastyratyn kompaniialar ashyldy. Qoǵam dáriger men ustazdardyń qadirin túsindi. Óz balalaryn oqytyp sharshaǵan ata-analar bar. Qazir jaǵdai qalyptasyp kele jatyr. «Ashyq» jobasy ashylyp, aýrý qarqynyn baqylaý kúsheidi. Buryn ýaqyt jumsap, jinalystarda bas qosyp júrsek, qazir alys jerlerden, aýdandardan kelmei-aq, onlain rejimde sóilesetin múmkindik týdy», - dedi Eraly Toǵjanov.
Óz kezeginde Aqparat ministri jýrnalistikanyń halyq arasyndaǵy turaqtylyqty saqtaýdaǵy róli týraly aitty.
«Aqparat ministrliginiń salasy aýqymdy bolǵanymen, men eń basty turaqty ómirdiń saqtalýyndaǵy BAQ rólin aitqym keledi. Ol tek pandemiiada ǵana emes, jalpy qoǵamnyń ári qarai órkendeýine, eldiń sana-sezimi ózgerýine, talǵam qalyptasýyna eń basty yqpal etedi. Sondyqtan, bizdiń eń basty mindetimiz – osy salada júrgen mamandar adami kapital desek, sol mamandardyń tájiribeli bolýy. Jýrnalistikanyń jalpy damýy, ár jýrnalistiń tájiribeli bolýyna úlken mán berip otyrmyz», - dedi Aqparat ministri elordada Prezidenttik jastar kadrlyq rezervi forýmynyń «Adami kapital» sessiiasynda.
Onyń aitýynsha, Aqparat ministrligi ótken jyly jýrnalistikany damytý boiynsha arnaiy jospar qabyldady, ol jýrnalisterdi daiarlaý, qaita daiarlaý jáne biliktiligin arttyrý máselelerin kózdeidi.
«Salalyq jýrnalistikanyń qanshalyqty mańyzdy ekenin kórdik. Osyǵan bailanysty bizdiń ministrlik memorandýmdarǵa qol qoidy, túrli salalar boiynsha jýrnalisterdi daiarlaýǵa baǵyttalǵan naqty seminarlar ótip jatyr. Eń aldymen meditsina boiynsha, pandemiia kezinde senimdi jáne kásibi aqparat berý arqyly qoǵamda turaqtylyqty saqtaýdyń qandai mańyzdy ekenin kórdik. Qoǵamda kóptegen feikter paida bolyp, túsinispeýshilikter týyndady. Ólim-jitim deńgeii joǵary bolsa da, adamdar virýstyń baryna, onyń asa qaýipti ekenine senbedi. Árine, munda aqparatty kásibi túrde berý mańyzdy boldy», - dep atap ótti A. Balaeva.
Sonymen birge ministr jalǵan aqparatpen kúres sharalary týraly aityp berdi.
«Bizdiń kezdesýlerdiń birinde rezervist Aleksandr Danilov basqaratyn StopFake saityn qurǵanymyzdy aitqan edim. Onyń jobany qolǵa alǵanyna jáne tabysty júrgizip jatqanyna alǵys aitamyn. Biz agrarlyq elde turatynymyzdy eskere otyryp, agrarlyq ýniversitettermen de memorandýmǵa qol qoidyq. Etnosaralyq kelisim jáne jalpy dini bilim berý máseleleri de óte mańyzdy. Munda da biz jýrnalisterge arnalǵan kýrstar júrgizip jatyrmyz. Bul máseleler únemi jetildirilip otyrady. Sonymen qatar, biz halyqaralyq mediamekteptermen jumys istep jatyrmyz», - deidi vedomstvo basshysy.
Mádeniet jáne sport ministri A. Raiymqulova elimizdegi eń mańyzdy rezerv – adami rezerv ekenin aitty.
«Elimizdiń eń mańyzdy rezervi – adami rezerv. Muny Táýelsizdiktiń eń birinshi kúninen beri Elbasymyz jáne qazirgi Prezidentimiz de aityp júr. Sondyqtan sizderge eńbek joldaryńyzda da, ómirlik joldaryńyzda da jaqsylyq tilep, kásibi qabiletterińizdi elimizdiń kórkeiýinde kórsetýge niet qylamyn. Mádeniet, sport, týrizm salasy – qoǵamnyń eń erekshe salalary dep oilaimyn. Mádeniettiń deńgeii – jalpy el men qoǵamnyń deńgeiin kórsetedi. Elimizde eń birinshi kúnnen bastap «Mádeni mura», «Rýhani jańǵyrý», «Uly dalanyń jeti qyry» atty úlken baǵdarlamalyq maqalalar shyǵyp, mádenietimizdiń ártúrli salalarda damýyna úlken jumys júrgizip jatyrmyz», - dedi A. Raiymqulova.
Al Ashat Aimaǵambetov Prezidenttik kadrlyq rezervtiń jumysyna airyqsha toqtaldy.
«Joba óte keremet. Shyn máninde, balalar óte jaqsy iriktelgen. Men muny jumys berýshi retinde aita alamyn jáne baiqap otyrmyn. Bes adam Bilim jáne ǵylym ministrligine jumys isteýge keldi, taǵy 17 adamdy biz joǵary oqý oryndarymyzdyń direktorlar keńesiniń quramyna tarttyq. Qazir biz «Bilimdi el» ulttyq jobasyn talqylaýdamyz. Sizderdiń arqalaryńyzda kóptegen ózgerister bolyp jatqanyn kórip otyrmyz», - dedi Bilim jáne ǵylym ministri.
