Foreign Policy basylymy ekonomika boiynsha Nobel syilyǵy iegerleriniń pandemiiadan keiingi álem ekonomikasy týraly pikirin bildi, dep habarlaidy QazAqparat.
«Pandemiia kezinde álem ekonomikasynyń bolashaǵyn «belgisizdik» dep qana sipattaýǵa bolady. Kásiporyndar men kompaniialar jumysyn jandandyra ma? Adamdar saiahatqa qaita shyǵa ma? Úkimetter bólgen qarajat retsessiiadan saqtai ala ma? Osy suraqtardy birneshe sarapshyǵa qoiǵan edik», - dep jazady basylym.
Ekonomist Djozef Stiglitstiń aitynsha, qazirgi tańda jahandaný men memlekettik ózin-ózi qamtý deńgeiinde balans saqtaý mańyzdy.
«Buryn ekonomister óndiris pen energetikalyq qaýipsizdik máselesine basa nazar aýdarý kerek degen pikirge kúletin. Olar jahandaný dáýirinde shekara mańyzdy bolmaitynyn, basqa memleketter únemi kómekke keletinin alǵa tartatyn. Al qazir shekara jabyq. Memleketter óz elinde óndiriletin maskalarǵa muqtaj bolyp qaldy. Koronavirýs pandemiiasynan týyndaǵan daǵdarys saiasi jáne ekonomikalyq birliktiń bazasy – memleket ekenin taǵy bir márte eske túsirdi», - deidi Djozef Stiglits.
Al Robert Shillerdiń aitýynsha, qazirgi jaǵdai ózgeristerge múmkindik beredi.
«Pandemiia jańa joldar ashyp, tyǵyryqtan shyǵýdyń jańa quraldaryn izdeýge múmkindik jasady. Bul jaǵdaida búkil álem madannyń bir jaǵynda qaldy. Iaǵni, jańa halyqaralyq institýttar qurýǵa motivatsiia paida bolýy múmkin», - deidi sarapshy.
