Pandemiiadan 34 politsiia qyzmetkeri qaitys boldy. Bul týraly Májilistegi Úkimet saǵatynda QR Ishki ister ministri Erlan Turǵymbaev aitty, dep habarlaidy QazAqparat.
«Aldymen eldegi kriminogendik jaǵdaiǵa toqtalaiyn. Jalpy qylmystyq ahýal turaqty. Kisi óltirý, densaýlyqqa aýyr ziian keltirý, tonaý, urlyq, buzaqylyq, zorlaý faktileri azaidy. Kóshelerde jáne qoǵamdyq oryndarda, buryn sottalǵandarmen, kámeletke tolmaǵandarmen, mas kúiinde, sondai-aq qarý qoldaný arqyly jasalatyn qylmystar tómendedi. Qylmystyń ashylýy jaqsardy. Mundai jaǵdai 3 jyl boiy saqtalýda», - dedi ministr.
Onyń atap ótýinshe, álemdik pandemiia politsiia jumysyna ózgerister engizdi. Pandemiia kezinde politsiia qyzmetkerleri dárigerlermen birge kúndiz-túni, ýaqytpen sanaspai jumys istedi. Kúnine 12 myń qyzmetker jumysqa shyqty. Karantin jariialanǵanda 50 myń qyzmetkerge deiin jumyldyryldy.
«Olar – qoǵamdyq qaýipsizdikti qamtamasyz etti. 445 blok-posty kúzetti. 700 aýrý taraǵan aimaqty qorshaýǵa aldy. Meiramhanalar men oiyn-saýyq oshaqtarynyń jumysyn baqylady. Tikelei mindetten bólek osyndai jaýapty jumystarmen ainalysty. Ókinishke qarai, pandemiiadan 34 qyzmetker qaitys boldy. 19 612 qyzmetker aýrýdan jazylyp shyqty. Qazirgi tańda qyzmetkerlerdiń 98 paiyz vaktsinatsiiadan ótti», - dedi Erlan Turǵymbaev.
