Qazaqstan meditsina ýniversitetiniń epidemiologiia, biostatistika jáne dáleldi meditsina kafedrasynyń dotsenti Rafail Qypshaqbaev koronavirýs pandemiiasynyń qashan aiaqtalatyny týraly boljamyn aitty, dep habarlaidy QazAqparat.
«Boljam jasaý - abyroi bermeitin is. Pandemiiaǵa kelsek, buǵan deiingi tuspaldarym teris ketip kórgen joq. Virýs mýtatsiiaǵa túsken saiyn taralý aýqymy keńeietinin, indet juqtyrǵandardyń sany arta túsetinin, biraq aýyrtpalyǵy alǵashqydan jeńilirek bolatynyn aitqan edim. Solai boldy da. Bálkim, koronavirýs simptomsyz infektsiia deńgeiine deiin túrlenetin shyǵar. Iaǵni, birinshiden, virýs ǵaiyp bolmaidy. Ol bizben birge óte uzaq ómir súretin shyǵar. Iá, qazir biz virýstyń saldarymen ǵana kúresip otyrmyz. Sebebin emdeý múmkin bolmai tur. Osyny eskersek, pandemiia toqtai qoimaidy», - dedi ǵalym Densaýlyq ministrligi uiymdastyrǵan onlain dáriste.
Mamannyń aitýynsha, koronavirýstyń tumaý siiaqty deńgeidegi aýrýǵa ainalatyny týraly boljamdardyń negizi bar.
«Koronavirýs pandemiiasyna bailanysty shekteý sharalarynyń bári 1-1,5 jyldan keiin aiaqtalýy múmkin. Sodan keiin bul virýs ómirimizge myqtap enip, tumaý men sýyq tiiý arasyndaǵy aýyrtpalyǵy bar aýrý qozdyrǵyshqa ainalady. Sirek jaǵdailarda táýekel toptarynyń ókilderi úshin asqynýlary bolýy múmkin. Biraq basym jaǵdaida adamdar bul infektsiiany ońai ári jeńil ótkeredi», - dedi Rafail Qypshaqbaev.
