Koronavirýs pandemiiasy týrizm salasyna úlken soqqy jasady. Álemniń qai eline bolmasyn keletin týristerdiń sany kúrt tómendedi. Álbette, bul indetten týyndaǵan daǵdarys Qazaqstanǵa da áser etpei qoiǵan joq, dep habarlaidy Energyprom.kz.
2020 jyldyń birinshi toqsanynda syrtqy týrizmniń álemdik kórsetkishi aldyńǵy jylǵy kórsetkishten 28,6%-ǵa tómen boldy.
Al ekinshi toqsanda búkil álemde eń qatań karantin shekteýleri engizilgen kezde týrizm tolyqtai toqtap, sheteldik týristerdiń álemdik aǵyny 18,4 ese azaidy (Qazaqstan Respýblikasynda osy kezeńde - 16,7 ese).
Jalpy, 2020 jyly Dúniejúzilik týristik uiymnyń málimetteri boiynsha sheteldik týristerdiń álemdik aǵyny 3,8 ese quldyraǵan.
«Qazaqstanda byltyr «koronadaǵdarystyń» úsh toqsanynda (sońǵy toqsandaǵy málimet áli shyqqan joq) elge kirgen týrister sany birden 3,6 ese azaiyp, 1,8 mln adamdy qurady. Aldyńǵy jyly elge 6,4 mln týrist kelgen edi. Qazaqstannan shetelge shyqqan týrister sany 2,4 million adamdy ǵana qurady. Bul 2019 jylmen salystyrǵanda 3,4 ese az», - delingen energyprom zertteýinde.
Qazaqstandaǵy qonaq úiler men kisi ornalastyratyn basqa da oryndarǵa úsh toqsanda kelýshiler sany 2,6 million adamdy qurady.
Bul aldyńǵy jylǵy kórsetkishten eki ese az. Sonymen birge sheteldik týrister - jalpy kelýshiler sanynyń tek 7,5%-yn qurady (aldyńǵy jyly - 15,5%).
Qonaq úiler, jataqhanalar, sanatoriiler jáne basqa ornalastyrý oryndarynyń sany bir jyl ishinde 3,9% -ǵa, iaǵni 2020 jyldyń úshinshi toqsanynyń sońynda 3,5 myńǵa deiin azaidy.
Qazaqstanda otandyq týrizmdi damytý maqsatynda Qazakhstan Travel and Tourism Council resýrs ortalyǵy qurylǵan.
Qazirgi tańda ortalyq týrizm salasyndaǵy innovatsiialyq tehnologiialardy engizý máselesin pysyqtap jatyr.
Ortalyq eń aldymen týristik qyzmet kórsetetin biznes ókilderine qoldaý kórsetpek.
