Halyqaralyq valiýta qory (HVQ) QR Ulttyq banki men Úkimetiniń koronavirýs pandemiiasymen kúres jolyndaǵy daǵdarysqa qarsy sharalaryna jaqsy baǵa berdi, dep habarlaidy "Ult aqparat".
Ulttyq banktiń baspasóz qyzmetiniń málimetinshe, biylǵy jyldyń 2-13 qarashasy aralyǵynda QR-daǵy Halyqaralyq valiýta qorynyń missiia basshysy Nikolia Blansheniń tóraǵalyǵymen HVQ qyzmetkerleriniń memlekettik organdardyń, qarjy naryǵy men kvazimemlekettik sektor uiymdarynyń ókilderimen onlain kezdesýler ótti. Maqsat – Qazaqstannyń qazirgi qarjylyq-ekonomikalyq damý jolyna, daǵdarysqa qarsy qoldaý sharalaryna, aqsha-kredit jáne biýdjet-salyq saiasatyna sholý jasaý.
Halyqaralyq valiýta qory ókilderiniń pikirinshe, Ulttyq bank pen Úkimettiń COVID-19 pandemiiasy men syrtqy jaǵdaidyń kúrt nasharlaýyna qarsy qabyldaǵan sharalary der kezinde qolǵa alynǵan sheshimder boldy. Halyqaralyq uiym tarapynan Ulttyq banktiń infliatsiialyq targetteý saiasatyndaǵy beiildiligi joǵary baǵalandy.
Ulttyq bank basshylyǵy men onyń quramyndaǵy negizgi departament jetekshileri HVQ ókilderimen birge pandemiianyń saldaryn talqylady. Sondai-aq munai naryǵyndaǵy qubylmaly baǵanyń el ekonomikasyna tigizip jatqan áserine toqtalyp, oǵan qarsy júrgizilip jatqan qarjy-kredittik jáne makroekonomikalyq saiasat pen aiyrbastaý baǵamynyń saiasatyna qatysty sharalardy sóz etti. Kezdesý kezinde ekonomikalyq belsendilikti qaita qalpyna keltirý boiynsha qolǵa alynǵan sharalar da aitylyp, halyqty jáne shaǵyn jáne orta biznesti qoldaý, qarjylyq turaqtylyqty qamtamasyz etý máseleleri de sóz boldy.
«HVQ memlekettiń pandemiianyń saldaryna qarsy qabyldaǵan sharalaryna jaqsy baǵa bere otyryp, osyndai daǵdarys kezeńinde nyq ári inkliýzivti ósimge beiildiligin qoldaidy.
HVQ missiiasynyń kelesi otyrysy 2021 jyldyń kóktemine belgilendi», - delingen Ulttyq bank aqparatynda.
