Almaty ákimdigi Frantsiianyń jetekshi dárigerleriniń qatysýymen júkti áielder men bosanatyn áielderdiń densaýlyǵyn qorǵaý boiynsha vebinar ótkizdi, dep habarlaidy QazAqparat.
Almaty qalasy ákimdiginiń bastamasymen jáne QR Frantsiiadaǵy Elshiliginiń jáne Frantsiianyń QR Elshiliginiń qoldaýymen, analar men balalardyń densaýlyǵyn qorǵaýǵa, negizinen COVID-19 áseri, reanimatsiialyq sharalardy basqarý tetikteri, sondai-aq neonataldy kútý erejelerine (týǵannan 28 kúnge deiingi kezeń) arnalǵan onlain vebinar ótti.
Vebinarǵa Almaty men Parijdegi jetekshi aýrýhanalardyń akýsher-ginekologtary, neonatologtary, anesteziolog-reanimatologtary qatysty.
Perinataldyq kútim salasyndaǵy Frantsiianyń jetekshi sheteldik mamandary COVID-19 kezinde júkti áielder men jańa týǵan nárestelerdi perinataldy kútý tájiribelerimen bólisti.
Almaty qalasy ákiminiń orynbasary Erjan Babaqumarov óziniń sózinde Frantsiianyń Qazaqstandaǵy elshisi Dide Kanesske jáne frantsýz densaýlyq saqtaý uiymy men Assistance Publique-Hôpitaux de Paris (AP-HP) ýniversitetiniń aýrýhana ortalyǵy aýrýhanasy direktorynyń halyqaralyq qatynastar jónindegi orynbasary Alen Berdege birlesken is-sharalar men vebinar uiymdastyrýda qoldaý kórsetkeni úshin alǵys bildirdi.
Búginde Almaty úshin júkti áielder men jańa týǵan nárestelerdi kútý, ásirese pandemiia kezinde óte mańyzdy.
Almatyda osy baǵytta ana men sábi óliminiń aldyn alý boiynsha keshendi jospar júzege asyrylýda. Júkti, bosanǵan áielderge ýaqtyly bilikti kómek kórsetý úshin mobildi toptar quryldy jáne jumys isteidi; AMSK deńgeiinde qalanyń kópsalaly toby deńgeiinde qaýip tobyndaǵy júkti áielder boiynsha konsiliýmdar ótkiziledi.
Port Royal – AP-HP perinataldyq ortalyǵynyń akýsher-ginekology Oliviia Anselem koronavirýs infektsiiasyn juqtyrǵannan keiin ár túrli jastaǵy júkti áielder arasynda júrgizilgen zertteýdiń aldyn ala nátijelerimen tanystyrdy.
Virýs juqtyrǵan júkti áielderde asqynýlar preeklampsiia ákelýi múmkin (bul júktiliktiń 20 aptasynan keiin damityn jáne joǵary qan qysymymen (140 jáne / nemese 90 mm rt.st.-den joǵary), proteinýriiamen jáne jii isinýmen sipattalatyn júktiliktiń asqynýy).
Sonymen birge infektsiianyń anadan balaǵa juǵý jaǵdailary týǵanǵa deiin de, bosanǵannan keiin de tirkelgen.
Sonymen qatar, reanimatsiialyq sharalardy basqarý jáne neonataldy kómek kórsetý máseleleri qarastyryldy. Doktor Eli Hadj Port Roial jáne professor Valeri Biran júkti nemese bosanatyn áieldegi bar aýrýlardy eskere otyryp, emdeýdiń núkteli ádisin atap ótti.
Vebinardyń sońynda qatysýshylar júkti áielderdiń qaýip tobyna jatatyndyǵyn jáne osy sanattaǵylar, profilaktikalyq sharalardy kúsheitýdiń, qajet bolsa psihologiialyq kómek kórsetýdiń mańyzyn atap ótti.
Júkti áielderdiń densaýlyǵyn saqtaý úshin qaýipsiz orta qajet. Sondyqtan virýstyń aýa-tamshy jolymen juǵýynyń aldyn alý úshin júkti áielderdiń týystary men dostaryna, sondai-aq barlyq almatylyqtarǵa vaktsinalaný máselesin keiinge qaldyrmaý usynyldy.
Almaty qalalyq Qoǵamdyq densaýlyq basqarmasynyń basshysy Nariman Tabynbaev atap ótkendei, vaktsinalaýmen megapolis turǵyndarynyń 44%-y qamtylǵan.
