Almatyda pandemiia jaǵdaiynda qalanyń azyq-túlik qaýipsizdigin qamtamasyz etý – mańyzdy máselelerdiń biri bolyp otyr. Ákimdik osy maqsatta birqatar mańyzdy sharany qolǵa aldy, dep habarlaidy "Ult aqparat".
Qalalyq ákimdik qala turǵyndaryn úzdiksiz azyq-túlikpen qamtý úshin ýaqytynda iri óndirýshilermen tiimdi baǵada kelisimshartqa otyryp úlgergen. Bul azyq-túliktiń turaqtandyrý qoryn qurýǵa múmkindik berdi.
Turaqtandyrý qoryn tolyqtyrýǵa jergilikti biýdjetten 7 mlrd teńge qarajat bólindi. Jyl basynan beri áleýmettik turǵydan mańyzdy azyq-túlikterdiń baǵa indeksi 108,1% bolǵan (Qazaqstanda – 109%).
Budan bólek «ainalym» syzbasy aiasynda aýylsharýashylyq ónimderin saýda jelileri arqyly belgilengen baǵamen satý jalǵasyp jatyr. Biyl qarasha aiynan bastap jalpy quny 1,5 mlrd tg bolatyn 12 myń tonna «kókónis qory» satyla bastady.
Sonymen qatar, «Aqsai» nan-toqash kombinaty» JShS-ne 1 surypty unnan áleýmettik nan óndirý úshin 1 mlrd tg kóleminde jeńildetilgen nesie berildi.
Aýylsharýashylyq ónimderin óndirýshiler men distribiýtorlarǵa nesie berý jaiy pysyqtalyp jatyr. Aýylsharýashylyq ónimderin tikelei jetkizý uiymdastyrylyp jatyr.
Sonymen qatar, búginde sanitarlyq sharalardy saqtai otyryp, demalys kúnderinde 7 jármeńke kezeń-kezeńimen ótkizildi. Munda Almaty oblysynyń qalaǵa jaqyn ornalasqan aýdandarynyń aýylsharýashylyq ónimderin óndirýshileri men Almaty qalasynyń tamaq ónerkásibi kásiporyndary ónimderin bazardaǵydan tómen baǵamen satyp jatyr.
Jaqynda Almaty, Jambyl oblystarynyń aýyl sharýashylyǵy ónimderin óndirýshilerdiń keńeitilgen jármeńkeleri ótti. Onda 760 tonnadan astam ónim satyldy.
Qabyldanǵan sharalar aiasynda qalany negizgi azyq-túlik taýarlarymen qamtamasyz etý jaǵdaiy turaqty. Áleýmettik mańyzy bar azyq-túlik ónimderiniń baǵasyn turaqtandyrý boiynsha jumystar jalǵasyp jatyr.
