Koronavirýs pandemiiasy bastalǵaly Eýropalyq odaqqa múshe eki el halyqtyq sailaý ótkizdi. Frantsiia men Polshadaǵy sailaý jaily QazAqparattyń Briýsseldegi menshikti tilshisi aityp beredi.
Frantsiiada mýnitsipaldy sailaý eki kezeńde ótti. Onda respýblika azamattary jergilikti ózin-ózi basqarýdy tańdady. Birinshi kezeń 2020 jylǵy 15 naýryzda, al ekinshi kezeń 8 maýsymda ótti.
Bir qyzyǵy, sailaýdyń birinshi kezeńinen keiin Frantsiianyń birqatar qalasynyń merleri eldiń premer-ministrine ujymdyq úndeý joldady. Onda olar sailaýdyń kelesi kezeńin keshiktirmeýdi suraǵan, óitkeni qala biligi karantinniń saldaryn joiý úshin bar kúshin salýǵa múddeli boldy.
Pandemiia jónindegi ǵylymi keńestiń kelisimi boiynsha Frantsiia úkimeti maýsymnyń sońǵy jeksenbisinde ekinshi kezeńdi ótkizýge kelisti. Osyǵan bailanysty jergilikti sheneýnikter sailaýshylardy jeke qorǵanys quraldarymen qamtamasyz etýge ýáde berdi.
Frantsýz baqylaýshylarynyń pikirinshe, pandemiia úgit-nasihat pen daýys berý protsesine aitarlyqtai áser etti. Kandidattar ózderiniń úgit-nasihat jumystaryn óz komandalarymen kezdespei ótkizdi. Olar Internet arqyly belsendi úgit jumystaryn júrgizdi.
Pandemiia kezinde Polshada jalpyhalyqtyq sailaý ótti, onda eldiń jańa prezidenti sailandy. Birinshi kezeń 2020 jylǵy 28 maýsymda, ekinshi kezeń 12 shildede ótti. Ekinshi kezeńde Andjei Dýda jeńiske jetti.
Koronavirýs pandemiiasyna bailanysty Polsha prezidentin sailaý eki jolmen ótti: dástúrli túrde jáne «poshta arqyly». Daýys berýge arnalǵan arnaiy paketter alǵan 200 myńǵa jýyq poliak qashyqtan daýys berý múmkindigin paidalandy.
