Pandemiia jahandyq jáne eldik deńgeide densaýlyq saqtaý júiesi men ekonomikanyń álsiz tustaryn kórsetip berdi. Bul týraly Joǵary eýraziialyq ekonomikalyq keńestiń otyrysynda Qazaqstan Prezident Qasym-Jomart Toqaev aitty, dep habarlaidy QazAqparat.
«Ókinishke qarai, mine 1,5 jyl boiy pandemiia bizge júzbe-júz júzdesýge múmkindik bermei otyr. Degenmen, bul jait bizdiń birlesken jumystarymyzdyń sapasyna kedergi keltire almaityndyǵy qýantady. Elderimizde júzege asyrylyp jatqan vaktsinatsiia men ózge is-sharalar taiaý ýaqytta ahýaldyń turaqtanýyna múmkindik berip, kelesi otyrysty dástúrli formatta ótkizetindigimizge senimdimin», - dedi Qasym-Jomart Toqaev.
Memleket basshysynyń atap ótýinshe, pandemiia jáne onymen bailanysty is-sharalar jahandaný protsesin úzip, álemdik sharýashylyq tártiptiń qurylymyn ózgertti. Álemniń iri ekonomikalary arasyndaǵy saýda-ekonomikalyq janjaldar kúrdeli jaǵdaidy kúrdelendire túsýde.
«Osylaisha, álemdik qoǵamdastyq birshama kúrdeli syn-tegeýirinmen, mindettermen betpe-bet kelip otyr. Pandemiia jahandyq jáne eldik deńgeide densaýlyq saqtaý júiesi men ekonomikanyń álsiz tustaryn kórsetip bergeni anyq. Ekinshi jaǵynan, ol ekonomikanyń jekelegen salalarynyń – farmatsevtika ónerkásibiniń, meditsinalyq qyzmet salasynyń, bioinjenerlik jáne tsifrlyq tehnologiialardyń damýyna tyń serpin berdi. Osynaý jańa jaǵdailarda biz barynsha ózekti máselelerdiń – ekonomikalyq daǵdarys saldaryn qalai eńserýdiń, ekonomika damýynyń qalpyna kelý jolyna shyǵýdyń tiimdi sheshimin tabýymyz qajet», - dedi Qasym-Jomart Toqaev.
