Saýda jáne integratsiia ministri Baqyt Sultanov pandemiianyń saldary Qazaqstannyń eksporttyq áleýetine qalai áser etkenin aityp berdi, dep habarlaidy "Ult aqparat".
«Memleket basshysy Joldaýynda shikizattyq emes eksportty ulǵaitý týraly tapsyrma bergen bolatyn. Onyń jartysyna jýyǵy (42%) qazir joǵary jáne ortasha óńdeý satysyndaǵy ónimderden turady. Onyń kólemi turaqty túrde ulǵaiyp keledi. Óńdelgen eksporttyń negizgi taýarlary - mys jáne mystan jasalǵan katodtar, ferroqorytpalary, ýran, munai óńdeý ónimi jáne basqalar», - dedi Baqyt Sultanov OKQ-da ótken baspasóz máslihatynda.
Ministrdiń aitýynsha, álemde pandemiia saldarynan shyqqan saýda-ekonomikalyq ózgerister bir jaǵynan táýekelderdi týyndatsa, ekinshi jaǵynan otandyq kásiporyndardyń eń joǵary qosylǵan quny bar ónimdi óndirýge kóshýine «múmkindik terezesin» ashady.
«Osy jyly pandemiia áserinen otandyq ónimdi dástúrli satyp alýshylardyń birqatary óziniń óndiris kólemin qysqartyp, qazaqstandyq ónimdi satyp alýdy báseńdetti. 8 aidyń qorytyndysy boiynsha óńdelgen taýarlardyń eksporty 7,3%-ke – 10,4-ten 9,7 mlrd AQSh dollaryna deiin azaidy. Eksporttyń negizgi tómendeýi munai ónimderiniń (-332,6 mln $), ferroqorytpalarynyń (-249,7 mln $), myryshtyń (-121,2 mln $) jetkiziliminiń qysqarýy jáne baǵalardyń tómendeýi esebinen bolyp otyr», - deidi ol.
Alaida ministr tamaq ónerkásibiniń eksporty kóbeiip, un, kúnbaǵys maiy, makaron ónimderi, siyr eti, soia maiyna suranystyń artqanyn aitady.
