Palestina-Izrail qaqtyǵysynyń ekinshi aptasy joiǵysh ushaqtardyń bombalaýy men zymyrandardyń kezektese jarylǵan daýysynan bastaldy. Áskeri áreketterdiń qarqyny údemese, báseńdegen joq, dep habarlaidy Reuters.
17 mamyrǵa qaraǵan túni izraildik aviatsiia «HAMAS» uiymynyń jerasty tonnelderin bombalady, al palestinalyq tarap Izrail qalalaryn zymyranmen atqylady. Gaza sektoryndaǵy resmi ókilderdiń habarlaýynsha, ótken jeksenbi – apta boiy jalǵasqan qaqtyǵys kezindegi ólim sany eń kóp bolǵan kún.
Gaza Densaýlyq saqtaý ministrliginiń dereginshe, jeksenbi kúni Izrail tarapy jasaǵan áýe soqqysynyń saldarynan birneshe úi qirap, 42 adam qaza tapqan. Olardyń arasynda 16 áiel men 10 bala bolǵan.
Odan keiin Izrail áskerleri sodyrlardyń tonnel júiesine soqqy jasalǵany týraly habarlaǵan.
«Tonnelderdiń opyrylýy onyń ústinde turǵan úilerdiń qiraýyna ákelgen. Sonyń saldarynan beibit turǵyndar qaza tapqan», - delingen Izrail qorǵanys áskeri – TsAHAL habarlamasynda.
Izrail áskerileri «HAMAS» tobymen bailanysty kóshbasshylardy kózdep otyrǵanyn málimdedi. Erterek olar «HAMAS» kóshbasshy Iahia Sinvar men onyń inisi Mýhammed Sinvardiń úilerine soqqy jasaǵan.
Dúisenbige qaraǵan túni áskeri áreketter burynǵy qarqynmen jalǵasty.
«Áskerilerdiń aitýynsha, Gazadan Izrail qalalary Ashkelon men Beer-Shevany zymyrandarmen atqylaǵannan keiin izraildik ushaqtar HAMAS-tyń joǵary deńgeidegi komandirleriniń toǵyz úiine soqqy jasaǵan. Úilerdiń keibiri qarý saqtaýǵa paidalanylǵan», - delingen habarlamada.
Izraildik áskeri-áýe kúshteri arasynda Gazanyń basty meditsinalyq mekemesi – tórt qabatty Al-Shif aýrýhanasy bar úkimettik mekemeler men úilerge ushaqtan júzdegen áýe shaýbylyn jasaǵan, dep habarlaidy Middle Ease Eye.
Bombalaý elektrlik jetkizý symdaryn zaqymdady. Bul anklavtyń aitarlyqtai aýmaǵynda elektrdiń sónýine alyp keldi.
Osy oraida qaqtyǵysqa álemniń alańdaýshylyǵy kúsheiýde.
BUU-nyń bas hatshysy Antoniý Gýterrish ári qaraiǵy áskeri áreketterdiń óńirdi «eńserilmeitin daǵdarysqa» ushyratý múmkin ekenin eskertti. Ol bul «sumdyqty» toqtatýǵa shaqyrdy.
Budan erterek Izrailge AQSh Memlekettik departamentiniń ókili deeskalatsiia boiynsha kelissózge qatysý úshin kelgen bolatyn.
Jeksenbi kúni, 16 mamyrda AQSh úshinshi ret Izrail men «HAMAS» arasyndaǵy qaqtyǵysty toqtatýǵa shaqyrǵan BUU Qaýipsizdik Keńesiniń birlesken málimdemesin buǵaqtady, dep habarlaidy The Times of Israel.
Dúisenbi kúni tańerteń Izrail áskeri ushaqtary Gaza qalasynyń birneshe aýdanyna 80 áýe soqqysyn jasady. Onyń aldynda «HAMAS» áskerileri Izraildiń ońtústik jaǵyna zymyrandar jibergen bolatyn, dep habarlaidy BBC.
BUU-da Gazadaǵy otyn jetispeýshiligi týraly eskertti. Bul aýrýhanalar men basqa mekemelerde elektrdiń óshirilýine ákeledi.
BUU-nyń taiaý shyǵystaǵy beibit protsess boiynsha arnaiy úilestirýshisiniń orynbasary Linn Hastings Izrail biligine BUU-ǵa otyn men materialdar kirgizýge ruqsat berýin suraǵan. Izrail biliginen munyń qaýipti ekeni jóninde jaýap alǵan.
Qazirgi kezde Gaza sektorynyń Densaýlyq saqtaý ministrliginiń dereginshe, anklavta qaza tapqandar sany – 197 adam, olardyń ishinde 58 bala men 34 áiel bar. 1 230 adam jaraqat alǵan. Tel-Aviv qaza tapqandar arasynda ondaǵan áskerilerdiń bar ekendigi týraly habarlaǵan. Izrailde qaza tapqandar sany – 10 adam, arasynda eki bala bar.
