Foto: AR
Pákistannyń Ulttyq qaýipsizdik keńesi (UQK) el aýmaǵyna jasalǵan úndi soqqylaryna jaýap berý úshin Qarýly kúshterge "áreket erkindigin" berdi, dep habarlaidy Samaa TV.
Tiisti sheshim 7 mamyrda premer-ministr Shahbaz Shariftiń rezidentsiiasynda ótken shuǵyl UQK otyrysynda qabyldandy. Jiynǵa qatysýshylar BUU Jarǵysynyń 51-babyna silteme jasap, eldiń ózin-ózi qorǵaý quqyǵyn negiz etip kórsetti.
"Pákistan kez kelgen ýaqytta, kez kelgen jerde jáne kez kelgen tásilmen jaýap berý quqyǵyn saqtaidy", – dep málimdedi UQK.
Sonymen qatar, keńes eldiń aimaqta beibitshilik ornatýǵa umtylatynyn, alaida egemendik pen ulttyq abyroi máselesinde eshqandai ymyraǵa kelmeitinin basa aitty.
Aita keteiik, 6 mamyrda Úndistan "Sindýr" áskeri operatsiiasy bastalǵanyn jariialady. Onyń aiasynda Úndistan Qarýly kúshteri Pákistan men oǵan tiesili Kashmir aýmaǵyndaǵy toǵyz "terroristik infraqurylym" nysandaryna zymyran soqqylaryn jasady.
Pákistannyń málimetinshe, soqqylar saldarynan keminde 26 adam qaza tapty. El biligi shabýyldardyń eshqaisysy áskeri bazalarǵa baǵyttalmaǵanyn alǵa tartty. Sondai-aq, Pákistan armiiasy Úndi áýe kúshteriniń bes ushaǵyn atyp túsirgenin habarlady. Alaida Úndistan biligi bul aqparatty rastamady.
