Aýyratlet Albert Linderdiń baýyry tosyn málimdeme jasady. Onyń aitýynsha, aýyratlet aǵasynyń ózine qol jumsaityndai kúige túsýine jattyqtyrýshysy sebep bolǵan. Bul aiypqa qatysty jattyqtyrýshy Sergei Sedov pikirin bildirdi. Al Qazaqstannyń aýyr atletika federatsiiasy tekserý júrgizbek, - dep habarlaidy Tengrinews.kz agenttigi KTK telernasyna silteme jasap.
Aǵasymen qosa onyń qol jetkizgen medaldaryn jerge kómgen Semen Instagram-daǵy paraqshasynda jariialaǵan jazbasynda ol Sergei Sedovty aiyptaidy.
"Qazaqstan qurmasynyń jattyǵýynda júrgende qalai qinalǵanyn kórdim. Bes kún boiy nár tatpai jattyǵý jasaǵanyna bári kýá. Oǵan eshkim kómekteskisi kelmedi. Qolyn syndyryp alǵan kezdiń ózinde jalǵyz ózin úige jibergen. Osynyń bárin jasap otyrǵan adam onyń jeke bapkeri ári Qazaqstan quramasynyń aǵa bapkeri. Ol adam emes. Sportta júrmeýi kerek. Balalardy jattyqtyrmaýy tiis", - dep jazdy Semen.
Sport jolyndaǵy kedergiler baýyrynyń saǵyn syndyrdy degen Semen saladaǵy bylyqty bári bilgenmen, aitýǵa batpai júrgenin aitady.
Al áleýmettik jelidegi aiyptaýdy jattyqtyrýshy Sergei Sedov ustamdylyqpen qabyldaǵan. Shákirti Alberttiń qazasy onyń da qabyrǵasyn qaiystyrǵan. Onyń aitýynsha, Rio Olimpiadasynyń aldynda tapsyrǵan sońǵy doping testtiń oń nátije kórsetýi Albertti qatty kúizeliske túsiripti.
"Ekeýmiz jii áńgimelesetinbiz. "Sporttan ketip jumys istegim keledi, Rio olimpiadasyndaǵy joldy qaita júrip ótkim kelmeidi" deitin. Onyń bala kezden taǵdyry qiyn boldy. Syryn menimen bólisetin. Týystaryn meni aiyptady dep kinálamaimyn. Qaiǵydan qara jamylyp otyr. Bárin túsinemin", - deidi Sedov.
Aýyr atletika federatsiiasy taǵylyp jatqan aiypqa qatysty áńgimeni qysqa qaiyrǵan.
"QR Aýyr atletika federatsiiasy bul isti baqylaýǵa alýǵa jáne árbir aiyptaý boiynsha tekseris jasaýǵa nietti. Jaqyn arada federatsiia árbir atletpen bailanysyp, ishki tergeý júrgizedi. Onyń qorytyndysy týraly qosymsha habarlanady", - dedi federatsiia ókilderi.
