QR Bilim jáne ǵylym ministri Ashat Aimaǵambetov ózin-ózi taný páninen sabaq berip júrgen jáne osy mamandyq boiynsha bilim alǵan pedagogterdiń keleshegi qalai bolatynyn aitty, dep habarlaidy QazAqparat.
Úkimet otyrysynan keiin ókten baspasóz máslihatynda Bilim jáne ǵylym ministrine ózin-ózi taný pánine mamandanǵan pedagogterdi jumyspen qamtý máseolesi týraly suraq qoiyldy.
«Ózin-ózi taný páni birinshiden 11 synypqa deiin mindetti emes, qosymsha pán retinde oqytylyp keldi. Bir jyl emes, bes jyl emes, odan uzaq merzimde osy jaǵdai qalyptasty. Jumasyna bir sabaq ótkiziledi. Qazirgi ýaqytta qabyldanǵan sheshim týraly jariialap aittyq. Ol mynadai. Kelesi jyldan bastap osy pán tek qana bir synypta, birden 11-ge deiin emes, tek bir synypta ǵana, onyń ózinde oqýshylardyń tańdaýyna bailanysty oqytylady. Eger balalar 5 synypta biz osy pándi tańdaimyz dese, tek osy synyptaǵy balalar oqýǵa múmkindik alady. Al tańdamasa, baiaǵydaǵydai 1 synyptan 11 synypqa deiin oqytylatyn pán bolmaidy degen sheshimimiz bar. Osy jumysty bastap júrgizip jatyrmyz», - dedi Ashat Aimaǵambetov.
Onyń aitýyna qaraǵanda, kelesi oqý jylynda atalmysh pán qysqartylǵan kúnniń ózinde, oǵan mamandanǵan pedagogter jumyssyz qalmaidy.
«Al kadrlarǵa kelsek, jalpy bizdiń ýniversietterde «Áleýmettik pedagog jáne ózin-ózi» taný degen mamandyq boldy. Onyń eń birinshi mazmuny – áleýmettik pedagog biliktiligi. Sondyqtan, olardyń kóbi búginde áleýmettik pedagog retinde jumys istep jatyr. Osy pándi berip júrgen muǵalimderdiń basym kópshiligi – basqa pánniń muǵalimderi. Onyń ishinde psihologtar, tarihshylar, basqa pánderdiń muǵalimder bar. Olardyń bári óziniń pánine sáikes sabaq beredi. Sondyqtan bul jerde eshqandai másele joq», - dedi ministr.
