QR Aýyl sharýashylyǵy ministrliginiń ósimdikter karantini jónindegi memlekettik inspektorlary Qazaqstanǵa zańsyz kirgizilmek bolǵan jemisterdi tárkilep, keri qaitardy, dep habarlaidy "Ult aqparat" vedomstvonyń baspasóz qyzmetine silteme jasap.
Ótken jyldyń jeltoqsan aiynda elimizge Ózbekstan Respýblikasynan qol júgi arqyly zańsyz jolmen 600 kg anar, 450 kg limon, 430 kg qurma, 57 kg ártúrli jemis ónimderi ótkizilmek bolǵan. QR Aýyl sharýashylyǵy ministrliginiń ósimdikter karantini jónindegi memlekettik inspektorlary tez arada bul jemisterdi tárkilep, keri qaitardy. Aiyptylar ákimshilik jaýapkershilikke tartyldy.
«Sonymen qatar, ótken jyldyń jeltoqsan aiynda Túrkistan, Aqmola, Atyraý, Pavlodar, Soltústik Qazaqstan jáne Qostanai oblystarynyń ósimdikter karantini jónindegi memlekettik inspektorlary Ózbekstan, Tájikstan, Túrkimenstan jáne RF-nan qaýipti ósimdik ónimderin zańsyz kirgizý boiynsha 20 fakti tirkep, tiisti shara qoldanyp aiyppul salǵan. Budan bólek, memlekettik inspektorlar fitosanitarlyq sertifikattary bolmaǵan jáne tańbalanbaǵan 17 tonnadan astam júzim, 16,2 tonna qyzylsha, 1,3 tonna alma jáne 24 kg gúl tuqymdaryn el shekarasyna kirgizbedi. Tájikstan jáne Túrkimenstan elderinen ákelingen 20 tonna keptirilgen jemis jáne 20 tonna qyzanaqqa Eýraziialyq ekonomikalyq odaq (EAEO) fitosanitarlyq talaptaryna sáikes bolmaýyna bailanysty ruqsat berilmese, RF-nan fitosanitarlyq sertifikatynyń joqtyǵy men tańbalanbaǵandary úshin 20 tonna bidai, 2,7 tonna asqabaq, 40 tonna kartop el shekarasynan óte almady» delingen habarlamada.
Taǵy bir aita ketetin jait, inspektorlar Reseiden «Jataǵan ýkekire» (qyzǵylt) ósimdik ziiankesi juqqan 76 tonna bidaidyń Qazaqstanǵa kirýine jol bermedi. «Jataǵan ýkekire» - eń ziiandy jáne joiý qiyn aramshópterdiń qataryna kiredi. Osy sebepti álemniń kóptegen elderinde ol qaýipti karantindik obektiler tizimine engizilgen.
Joǵaryda atalǵan faktiler boiynsha tolyq tekserý júrgizilip, ósimdikter karantini salasyndaǵy ulttyq zańnamalardyń talaptaryna sáikes júkter keri qaitarylyp, aiypty tulǵalar ákimshilik jaýapkershilikke tartyldy.
