Foto: yandex.kz
Keiingi jyldary Qazaqstan turǵyndary kórshiles Ózbekstanǵa jii saiahattaityn bolǵan. Onyń bir sebebi kez kelgen saiahatshyny ózine tarta alatyn kórshi eldiń kórikti jerleri bolsa, ekinshi sebebi bizdiń el turǵyndarynyń qaltasyna aýyr timeitin qoljetimdi baǵalar. Óz aǵamyzdyń eline saiahattaýǵa niettilerdiń qalaýyn eskerip, ULT.KZ tilshisi Ózbekstanǵa saiahattaýshylarǵa tiimdi keńester usynady.
Ádette týrister Ózbekstanǵa ortaǵasyrlyq Shyǵystyń atmosferasyna enip, jergilikti turǵyndardyń salt-dástúrlerimen tanysyp, áigili ózbek qaýyn-qarbyzy men palaýynan dám tatý úshin keledi. Kóne eskertkishterdi aralaýdan úzilis alǵysy keletinder jergilikti Disneilendke baryp, Sharbaq kýrortynda demalýy nemese Shymǵan taýlaryna saiahattaýy, Bildirsai aspaly kópirine minýlerine bolady.
El týraly negizgi málimetter
• Áýe biletinsiz elde bir kúndik komfortty demalysqa 20-30 myń teńge jumsalady. Oǵan qonaq úide túneý, tamaqtaný, poiyzben álde taksimen júrý, kórikti jerlerdi aralaý, táttiler men shaǵyn kádesyilar satyp alý kiredi. Bul biýdjet qazirgi tańda jeke ekskýrsiialyq týrlardyń esebimen esepteldi.
• Jergilikti turǵyndar qonaqjai jáne aqkóńil. Olar sizge esh qiyndyqsyz jol kórsetedi, baǵalar týraly aqparatpen bólisedi jáne taksi tabýǵa kómektesedi. Qonaqjailylyǵy jaǵynan Ózbekstan barlyq Ortalyq Aziia respýblikalarynyń esh birinen kem túspeidi.
• Klimaty kúrt kontinenttik, qurǵaq. Respýblikanyń kóp bóliginde jylyna 80-200 mm jaýyn-shashyn túsedi. Qańtarda soltústik-shyǵysta termometr -10 °C-qa jetedi. Al shildede aýa +50 °C deiin qyzady. Jazdyń ystyǵyna shydamsyz jandar Ózbekstanda qysta qydyrýlaryna bolady. Bul memlekette qys jyly ári jaýyn-shashynnyń azdyǵymen jaily.
Qashan barý kerek?
Ózbekstanǵa barýdyń eń jaqsy ýaqyty – jeltoqsan, naýryz jáne qyrkúiek pen qazan ailary. Degenmen Ózbekstnnyń esigi týristerge árqashan ashyq. Jaz ailarynda qatty ystyqqa bailanysty saiahattaý yńǵaisyz bolýy múmkin, biraq qurǵaq klimatta ystyqqa tózimdi jandar keshki Tashkent pen Samarqandtyń ásem kórinisterin tamashalaýyna bolady.
Taksiler men qoǵamdyq kólikter konditsionermen sirek jabdyqtalǵan, sondyqtan jol júrý yńǵaisyz bolady. Kúz ben qys mezgilinde aýa-raiy ashyq jáne qurǵaq, al temperatýra + 15-20 ° C deiin tómendeidi, bul uzaq serýendeýge ońtaily. Qysta qala mańyndaǵy shańǵy kýrorttaryna barýǵa bolady, bul ýaqytta týristik ómir toqtap qalmaidy.
Foto:flickr.com
Aýa temperatýrasynyń joǵary bolýyna qaramastan Ózbekstanda tym ashyq kiim kiiý ádetke ainalmaǵan. Ózbekstanǵa saiahattaý úshin eshqandai arnaiy kiim úlgisi talap etilmeidi. Biraq Tashkentte jáne basqa da iri qalalarda turǵyndar mini-iýbka kigenderge ersi qaraýy múmkin. Eskeretin bir jait, «ár eldiń salty basqa, itteri qara qasqa», sondyqtan bul eldiń de dástúri men tanym-túsinigine qurmet pen túsinistik tanytqan jón. Erler shorty az kiedi, al áielder iyǵy jabyq, jeńil kóilek kiiýge ádettengen.
Qazan jáne qarasha ailarynda ózińizben birge jyly kiim alǵanyńyz abzal, óitkeni keide túnde aýa aitarlyqtai sýytady.
Foto:wikipedia.org
Baǵalar
Ózbekstan boiynsha saiahattaý úlken shyǵyndardy qajet etpeidi. Áigili Tashkent ortalyǵyndaǵy palaýdyń eń qymbat portsiiasy 25 000 - 30 000 sým aralyǵynda (1100 tengeden sál astam), shelpek nemese samsa – 7000 sým (250 teńgeden astam), shai – 2000-5000 sým (90-200 teńge aralyǵynda). Ashana men shaihanalardaǵy taǵam óte maily bolǵanymen, arzan ári dámdi. Qonaq úi kafeleri barlyq týristerge qyzmet kórsetýge qýanyshty, sheksiz fýrshet (shved stoly) quny 5 dollar (2500 teńge).
Kólikti jalǵa alý eń qymbatqa túsedi, diapazon táýligine 15-20 myń teńge aralyǵynda shyǵyndanýǵa týra keledi. Degenmen shetel kólikterin alý baǵasy álde qaida joǵary. Tiimdisi taksi qyzmetine júgingen durys. Shyǵyndardyń ekinshi negizgi bóligi – jeke ekskýrsiialyq týrlar men gid qyzmetteri (kúnine 15 myń).
Qonaq úidi áleýmettik jeli nemese saittardy qoldanyp brondaý ońai, salystyrmaly túrde jaily qonaq úi baǵasy 10 myń teńgeden bastalady, jaqsy qonaqúidegi bir túnniń quny 15-30 myń teńgeni quraidy. Bazarlarda dástúrli saýda negizinde baǵa 10-20 paiyzǵa kóteriledi. Sondyqtan árqashan satýshymen saýdalasqan abzal. Bazarlarda saýdalasý ádetke ainalǵan jáne saýdagerlerdiń súiikti isi. Eger siz bul qyzyqqa qatysqyńyz kelmese, renjimeisiz, taýar sizge naqty baǵasynan sál qymbatqa túsedi.
Qysta barýǵa bolatyn kórikti jerleri
Negizgi demalys orny Tian-Shan taýlaryndaǵy Shymǵan taý shańǵysy kýrorty. Munda týristerdi taza aýa, shyrshaly ormandar jáne aspaly kópirmen serýendep taýlardy aralaý múmkindigi qyzyqtyrady. Shymǵan Tashkentten 80 km qashyqtyqta ornalasqan jáne jyl boiy qonaqtardy qýana qarsy alady.
Tashkent - Ózbekstannyń negizgi jáne eń zamanaýi qalasy. Munda kóne jádigerlikter kóp qalǵan joq, biraq qalada kóptegen qyzyqty murajailar, teatrlar men kitaphanalar bar. Jergilikti Disneilendke, akvaparkke nemese jaqyn mańdaǵy taý shańǵysy kýrorttaryna barýǵa bolady. Telemunaradaǵy tanymal týristik ainalmaly meiramhananyń terezelerinen qalanyń keremet panoramasy ashylady. Odan bólek, qazirgi tańda elimizdiń týristeri Tashkentte jańadan ashylǵan Magic City parkine kóp saiahattaýda.
Foto:kapital.kz
Qys mezgilinde Tashkent pen Shymǵan taýly aimaqtarynan basqa Samarqand, Hiýa, Buhara men Naýai oblystaryna saiahattaý múmkindigi bar. Bul oblystar óziniń tarihi jádigerlikteri men kóne ǵimarattarymen tanymal. Odan bólek tamaqtaný oryndaryn aralaýǵa bolady. Ásirese Tashkent qalasynda ornalasqan Chorsý bazarynyń tamaqtaný orny kóptegen týristerdi ózine qaratýda. Munda tamaq satý óneriniń ózgeshe úlgisin kórýge bolady. Ulttyq ashanasy men bazardaǵy túrli qolóner buiymdarymen dańqy shyqqan Chorsýda Ózbek ulttyq taǵamdarynyń túr-túrinen dám tatýǵa bolady.
