Ózbekstannyń "Adolat" («Ádilet») sotsial-demokratiialyq partiiasy TikTok jelisin tolyq buǵattaýdy surady. Partiia belsendileri muny "jastardy ózbek eline jat ideialardan jáne kózqarastardan qorǵaý" qajettigimen túsindirdi.
"Jaqynda bolǵan jaǵymsyz oqiǵadan keiin paidasynan góri ziiany kóp mobildik tirkemelerdi tolyǵymen buǵattap, sanktsiia qoiýymyz kerek", - dedi partiianyń baspasóz qyzmeti.
Osyǵan deiin áleýmettik jelilerde samarqandtyq jetkinshektiń kóshede ótip bara jatqan qariianyń betine tepkeni túsirilgen video jariialanǵan. Bul videony jetkinshek TikTok'taǵy paraqshasyna jariialaǵan.
Bir jarym ai buryn Ózbekstannyń Ulttyq BAQ-ty qoldaý jáne damytý boiynsha qoǵamdyq qordyń qamqorlyq keńesiniń tóraǵasy Kamil Allamjanov TikTok kompaniiasynyń vitse-prezidenti Teo Bertrammen onlain kezdesý ótkizgenin habarlaǵan.
Onda Allamjanov TikTok ókilderine "jeliniń ishki talaptaryn ózbek mentalitetine, salt-dástúrine sáikestendirý jóninde usynys aitqanyn" jetkizgen.
"Eger TikTok ziian bolsa, ony paidaly resýrsqa ainaldyrý kerek",- degen Allamjanov.
Ózbekstanda TikTok jelisi 2021 jyldyń jazynan beri bir istep, bir istemei turǵan.
