Ózbekstan biligi Sardoba sý qoimasynyń jarylýynan zardap shekkenderge 50 kópqabatty turǵyn úi salyp beretinin aitty. Prezident Shavkat Mirziiaev arnaiy jarlyqqa qol qoidy. Syrdariia oblystyq ákimdiginiń málimetine súiengen Gazeta.uz saitynyń jazýynsha, 50 kópqabatty úi 2020-2021 jyldary Sardoba, Aqaltyn jáne Mirzabad aýdandarynan salynbaq.
Jergilikti bilik sý tasqynynan zardap shekken otbasylardyń tizimin jasap, olarǵa kópqabatty turǵyn úi keshenderinen aqysyz páter bermek.
Premer-ministr Abdýlla Aripov jetekshilik jasaityn sý tasqynnyń saldaryn joiý jónindegi úkimet komissiiasy zardap shekken otbasylarǵa kómek kórsetýge jáne tasqyn zardabyn joiýǵa Syrdariia oblysynyń biýdjetine 100 mlrd som aqsha bóledi. Qajet bolǵan jaǵdaida qarajat kólemi ulǵaiady dep aitylady.
Sý sharýashylyǵy jáne qurylys ministrligi Sardoba sý qoimasyn qalpyna keltirý josparyn jasaýy tiis.
1 mamyrda Ózbekstannyń Syrdariia oblysyndaǵy Sardoba sý qoimasy jarylyp, ainalasyndaǵy aýyldardy sý shaiyp ketken. 1 mamyr túnde Sardobanyń sýy Qazaqstannyń ońtústigindegi, qazaq-ózbek shekarasynda ornalasqan Abai kanalyna jetip, Maqtaral aýdanyndaǵy birneshe aýyldy sý alǵan. Osydan soń Maqtaral aýdanynda tótenshe jaǵdai jariialandy.
Túrkistan oblysy ákimdiginiń málimetinshe, Maqtaral aýdanynda 14 aýyldyń 31 myńnan astam turǵyny evakýatsiialanǵan. 845 úi, 3 mektep, 5 balabaqsha, 4 meditsina ǵimaraty men mádeniet úii jáne 54,7 km kópir men joldy sý alǵan. Budan bólek, 7639 gektar egistik sý astynda qalǵan. Júzdegen mal ólgen.
Oqiǵaǵa bailanysty qurylǵan qazaqstandyq úkimet komissiiasy 6 mamyrda sýdan zardap shekken turǵyndarǵa árqaisysyna 100 myń teńge (shamamen 240 dollar) kóleminde kómek beriletinin aitty. Komissiia ókilderi sonymen birge úii jaramsyz qalǵan otbasylarǵa birneshe usynys jasady: biliktiń kómegimen basqa jaqqa kóshý nemese aýylda qalyp, úilerin jóndetkizý nemese biliktiń kómegimen óz betinshe jóndetý. Bilik ókilderi sý shaiǵan egistik pen mal shyǵynyn da óteýge ýáde bergen.
Buǵan deiin Ózbekstan Qazaqstannan keshirim suraǵan, al Qazaqstan narazylyq notasyn jiberý raiynan qaitqan.
