Ózbekstan qalalarynda jeke kólikpen júrýge tyiym salyndy, dep habarlaidy "Ult aqparat".
Koronavirýsqa qarsy kúres júrgizý jónindegi arnaiy respýblikalyq komissiianyń sheshimimen Ózbekstannyń Tashkent, Núkis jáne oblystyq mańyzy bar qalalarynda 30 naýryz ben 20 sáýir aralyǵynda jeke maqsattarda kólikpen júrýge tyiym salyndy. Qalada ruqsatsyz júre alatyn kólikter tizimine tek diplomatiialyq, kommýnaldyq qyzmet kórsetetin kólik quraldary, meditsinalyq-epidemiologiialyq qyzmet kórsetetin, aýylsharýashylyq ónimderin jetkizetin kólikter, meditsinalyq mekemelerge jáne olardan jedel meditsinalyq kómekke (júktilik, ómirge qaýip tóndirgen dene jaraqattary) muqtaj adamdardy ákelgen kólikter, qalalyq jáne aýdandyq ákimshilik basshylary, olardyń orynbasarlarynyń avtomobilderi, jerleý kólikteri, jedel jáne meditsinalyq kómek mashinalary, patrýldik avto, poshta qyzmeti jáne azyq-túlikti kýrerlik jetkizý kólikteri, sondai-aq kommertsiialyq bank avtomobilderi kiredi.
29 naýryzdan bastap shekteý qoiý kezeńinde qozǵalys ruqsat etilgen avtomobilder úshin arnaiy ruqsat (stikerlerdi) berý bastalady. Kólikke jeke múddemen minip júrýge tyiym salynǵan.
