Ózbekstan shekarasynda ustalǵan Nurlan Qultaev segiz jylǵa sottalýy múmkin. Oǵan kontrabanda tasymaldady jáne salyq tóleýden jaltardy degen aiyp taǵylýda, dep habarlaidy Sputnik agenttigi Syrtqy ister ministrligine silteme jasap.
Tergeýdiń basqa da mán-jaiyn ózbek tarapy jariialamai otyr. Qultaev abaqtyǵa 21 qyrkúiekte jabylǵan.
"Ózbekstan tarapynyń málimetine sáikes, oǵan salyq jáne basqa da ózge de tólemderden bas tartty degen aiyp taǵylýda. Onyń eki advokaty bar. Eki advokatyn týystary jaldaǵan. Aýdarmashy berilmegen. Sebebi bizdiń azamat ózbek tilin jetik meńgergen. Qazirgi tańda bizdiń konsýl Qazaqstan azamatymen kezdesýge áreketter jasap jatyr. Ózbekstan syrtqy ister ministrligine tiisti nota jiberildi. Soǵan jaýap kútip otyrmyz", — dep túsindirdi QR Syrtqy ister ministrliginiń resmi ókili Aibek Smadiiarov.
KTK arnasynyń habarlaýynsha, Nurlan Qultaev sýsyn men shokolad artqan eki Ózbekstan azamatyna jaldanyp, 14 qyrkúiek kúni osy beket arqyly Ózbekstanǵa ótpek bolady. Bizdiń kedenshiler 33 tona júgi bar kólikti op-ońai júksiz dep qujat toltyryp, shekara asyra salypty. Biraq, Ózbekstanǵa kirmei jatyp ala shapandy kedenshiler ustap, eki ózbekti birden qamaýǵa alsa, bir aptadan keiin Qultaevty da japqan.
Ózbek kedenshileriniń málimetinshe, Nurlan Qultaev ustala sala Túrkistan oblystyq kirister departamenti men kedenshilerine habarlama jiberipti. Biraq, ondaǵan tonna taýary bar kólikti júksiz dep ótkizip jiberip masqara bolǵan kedenshiler bul habarlamany eshkimge aitpaǵan.
Kedenshilerdiń bylyǵynan keiin beket basshysy óz qyzmetinen ketip, osy jáit boiynsha "salǵyrttyq" babymen qylmystyq is qozǵalǵan.
