18 naýryzda qylmystyq ister jónindegi Tashkent qalalyq soty Ózbekstannyń burynǵy prezidenti Islam Karimovtiń úlken qyzy Gúlnara Karimovany 13 jyl 4 aiǵa bas bostandyǵynan aiyrdy. Oǵan "bopsalaý", "qylmystyq jolmen alynǵan qarjyny zańdastyrý" jáne taǵy birneshe bap boiynsha aiyp taǵylǵan. Sot sonymen birge "Karimova qurǵan qylmystyq toptyń birneshe múshesine" úkim oqydy. Bul týraly Ózbekstannyń joǵarǵy sotyna silteme jasaǵan Azatttyqtyń Ózbek qyzmeti habarlady.
Bul is boiynsha Gúlnara Karimovanyń qamaýda bolý merzimi 2015 jyldyń 21 tamyz aiynan bastap eseptelinedi.
Byltyr tamyz aiynda Karimovaǵa qatysty jańa is qozǵalǵany belgili bolǵan edi. Bul is boiynsha oǵan «memleketke tiesili eki tsement zaýytynyń aktsiiasyn satyp aldy jáne ony keiin sheteldik biznesmenderge satty» degen aiyp taǵylǵan. Jeltoqsan aiynda "ashylǵan jaittarǵa bailanysty" taǵy bir qylmystyq is qozǵaldy.
Gúlnara Karimovanyń qyzy Iman Karimova áleýmettik jelide olar jaldaǵan bes advokat protsess bastalǵan kezde is materialdary týraly aqparat bermeý týraly qolhatqa qol qoiýǵa májbúr bolǵanyn jazdy. Eki advokatqa "belsendilik tanytsa, litsenziialarynan airylýy múmkin" ekenin eskertken. Bul sot protsesi jaily ózbekstandyq BAQ-ta aqparat jariialanbady.
2019 jyly jeltoqsan aiynda Ózbekstan biligi Gúlnara Karimovanyń shveitsariialyq advokaty Gregýar Manjaǵa "advokattyq etikany buzdy" dep elge kirýine tyiym salǵan.
18 naýryzda sot buǵan qosa "qylmystyq toptyń" birneshe múshesin uzaq jyldarǵa sottady. Eki aiyptalýshy "jaýapqa tartý merzimi ótip ketkendikten" qylmystyq jaýapkershilikten bosatyldy.
2017 jyly eldiń birinshi prezidenti Islam Karimov kóz jumǵannan keiin onyń úlken qyzy Gúlnara Karimova 10 jylǵa bas bostandyǵynan airylǵan. Ol kezde oǵan "salyq tóleýden jaltardy", "aqsha bopsalady" jáne "ofshor kompaniiasynyń qujattaryn joidy" degen aiyptar taǵyldy.
Birneshe aidan keiin úkim ózgerip, jaza bes jylǵa qysqardy jáne Karimova úiqamaqqa shyqty. Byltyr naýryzda ol úiqamaq tártibin buzdy dep qaita qamalǵan edi.
Aqpan aiynyń sońynda ózine qozǵalǵan qylmystyq isti jabý úshin Gúlnara Karimovanyń qazirgi prezident Shavkat Mirziiaevqa hat jazyp, memleketke 686 million dollar usynǵany týraly aqparat shyqqan.
