7 qazan kúni saǵat 08:13-te Syrdariia oblysynyń Gúlstan qalasyndaǵy «Alpomish» sport kesheninde ottegi ballony jaryldy, dep habarlaidy "Ult aqparat" Ózbekstan Respýblikasy Tótenshe jaǵdailar ministrliginiń Telegram-daǵy resmi paraqshasyna silteme jasap.
«Oqys oqiǵa bolǵan sport kesheni qazirgi tańda koronavirýs infektsiiasyn juqtyrǵan naýqastarǵa meditsinalyq kómek kórsetý úshin ýaqytsha klinika retinde jasaqtalǵan.
Ottegi ballonynyń jarylýy saldarynan ǵimarattyń terezeleri synyp, bir azamat jaraqat aldy. Qaza tapqandar joq. Oblystyq tótenshe jaǵdailar basqarmasy men basqa da tiisti organdar dereý oqiǵa ornyna kelip, azamattardy qaýipsiz jerge kóshirdi. Jaǵdai tolyq baqylaýda», - dep jazdy Ózbekstan Respýblikasy Tótenshe jaǵdailar ministrligi Telegram-daǵy resmi paraqshasynda.
