Ózbekstan bankterine klientterge 2020 jyldyń 1 qazanyna deiin jeńildik kezeńin usynýǵa keńes berildi, dep habarlaidy QazAqparat Ózbekstan Respýblikasy Ortalyq bankiniń baspasóz qyzmetine silteme jasap.
Vedomstvoda atap ótkendei, ortalyq bank koronavirýs infektsiiasynyń taralý jaǵdaiynda berilgen nesielerdi qaitarý kezinde kásipkerlik sýbektilerine keri áser etetin saldarlardy jeńildetý maqsatynda 2020 jyldyń 1 qazanyna deiin nesie boiynsha negizgi qaryzdy tóleý boiynsha jeńildik kezeńin berý týraly kredittik shart talaptaryna ózgerister engizý jáne jeńildik kezeńine qarai tólem merzimin uzartý máselelerin qaita qaraýdy usyndy.
Bul rette, kommertsiialyq bankterge talaptary joǵaryda baiandalǵan usynymdar negizinde qaita qaralǵan kreditter sapasynyń jiktelýin ózgertpeý quqyǵy berilgen.
Sonymen qatar, Ózbekstannyń ortalyq banki barlyq kommertsiialyq bankterge koronavirýs infektsiiasynyń taralýy saldarynan aqsha aǵyny deńgeii tómendegen jáne jobalardy iske asyrý merzimi keshiktirilgen kásiporyndardyń, onyń ishinde týrizm salasyndaǵy jáne halyqaralyq júk tasymalymen ainalysatyn kásiporyndardyń, koronavirýs keń taralǵan elderde negizgi kontragentteri bar sharýashylyq sýbektilerdiń, sondai-aq qyzmetine koronavirýstyń aldyn alý sharalary teris yqpal etetin Ózbekstandaǵy kásiporyndardyń nesielerin qaitarý múmkindigin muqiiat zertteýdi usyndy.
