Gúlnara Karimovanyń qylmystyq jolmen jinaǵan 10 million dollary Frantsiiadan Ózbekstanǵa qaitaryldy. Bul aqparatty Ózbekstan Ádilet ministrligi habarlady, biraq qashan, qai kúni qaitarylǵanyn aitpady. Aqparatty Azattyqtyń Ózbek redaktsiiasy jariialady.
Ózbekstan Ádilet ministrliginiń sózinshe, "2020 jyly mamyr aiynda da Gúlnara Karimovaǵa tiesili 10 million dollar qaitarylǵan. Qazirgi ýaqytta Shveitsariia, AQSh, Frantsiia, Resei jáne ózge de elderdiń biligi men ózbek biligi Ózbekstannan qylmystyq joldarmen zańsyz shyǵarylǵan aqshalardy qaitarý jóninde belsendi jumys júrgizip jatyr".
Ózbekstan men Shveitsariia arasyndaǵy kelissózdiń bir satysy 11 aqpanda ótken. "Eki tarap Birikken ulttar uiymynyń kóp jaqty trast qoryn qurýǵa ýaǵdalasty. Qordyń jumysy Gúlnara Karimovaǵa bailanysty qylmystyq is boiynsha kámpeskelengen aktivterdi qaitarýǵa baǵyttalady. Tek Karimova emes, ózge de kámpeskelengen aktivtermen jumys isteidi. Qazirgi ýaqytta 131 million dollar aqsha Ózbekstanǵa qaitarylýǵa daiyn tur, - deidi Ózbekstan Ádilet ministrligi.
Qordy basqarý mehanizmi Shveitsariia, Ózbekstan jáne Birikken ulttar uiymynyń ókilderinen quralady. Osylaisha, Shveitsariia men Ózbekstan avtivterdi qaitarýǵa kirisedi.
Ádilet ministrliginiń sózinshe, Gúlnara Karimaova jónindegi ózbek sottarynyń úkimderin Máskeý qalalyq soty moiyndaǵan, sol sebepti Resei de Karimovanyń kámpeskelengen aktivterin satýdy uiymdastyryp jatyr.
Gúlnara Karimovany Tashkent soty 2020 jyly 18 naýryzda 13 jyl 4 aiǵa sottaǵan bolatyn. Oǵan "qastandyq jasamaq boldy, bopsalady, urlyq jasady, aqsha jylystatty" degen túrli aiyptar taǵylǵan. Ózbekstandy kóp jyl basqaryp, aiaq astynan qaitys bolǵan avtokrat Islam Karimovtyń qyzy Gúlnara Karimova ákesi tiri kezinde-aq Tashkent oblysyndaǵy áielder koloniiasyna qamalǵan.
Biyl Qańtar qyrǵynan keiin prezident Qasym-Jomart Toqaev birneshe málimdeme jasap, úkimetke Qazaqstannan shetelge zańsyz shyqqan qarjyny qaitarýdy tapsyrǵan.
"Qańtar qyrǵynynan" keiin Qazaqstannyń burynǵy prezidenti Nursultan Nazarbaev "qaýipsizdik keńesiniń tóraǵasy" ókiletinen aiyrylyp, týystary joǵary qyzmetterinen bosaǵan. Osydan keiin Nursultan Nazarbaevtyń ainalasyndaǵy adamdardyń shetelge "zańsyz shyǵarǵan aqshalaryn qaitarý" jóninde qoǵam belsendileri sóz ete bastaǵan edi.
