QR Ekologiia, geologiia jáne tabiǵi resýrstar vitse-ministri Serik Qojaniiazov Ózbekstandaǵy «Sardoba» sý qoimasynan Qazaqstannyń eldi mekenderine qaýip joq ekenin aitty, habarlaidy QazAqparat.
Ortalyq kommýnikatsiialar qyzmetinde ótken brifingide ministrdiń orynbasaryna «Sardoba» sý qoimasynyń apatynan eki tarap qandai qorytyndy shyǵarǵany týraly suraq qoiyldy.
«Birinshiden, o basta Ózbekstan tarapy nysandy salǵan kezde bizben kelispedi. Biraq biz jaǵdaidy baqylap otyrmyz. Basynda onyń jobalyq qýaty 920 mln tekshe metrdei bolǵan. Sol avariiadan keiin bular byltyr 350 mln tekshe metr sýǵa múmkindik bolady dep, jóndeý jumystaryn jasady. Biyl sol 350 mln tekshe metr sýdy jinaqtap jatyr», - dedi vitse-ministr.
Aitýynsha, Ózbekstan atalmysh qoimanyń syiymdylyǵyn qaita qaraǵan.
«Bolashaqta Ózbekstannyń jospary burynǵy 900 mln tekshe metr emes, 600 mln tekshe metrge deiin aparyp, sonymen toqtatý týraly oilary bar. Biz ony baqylap, qarap otyrmyz. Ázirshe Qazaqstanǵa myna jaǵdaida qaýip joq degen boljam bar. Bizdiń mamandar da baryp keldi. Ózbek tarapynyń aityp otyrǵany da osy», -dedi Serik Qojaniiazov.
