Ózbekstan men Qazaqstan arasynda jańa qala paida bolýy múmkin. Bul týraly jyl qorytyndysy boiynsha elimizdiń BAQ ókilderimen kezdesý barysynda QR Prezidenti Nursultan Nazarbaev málim etti, dep habarlaidy QazAqparat.
«Shavkat Mirziioev Ózbekstannyń basshylyǵyna kelgennen beri jaǵdai múldem ózgerdi. El halqynyń sany 33 milliondy qurady. Bul, bizdiń aramyzdaǵy (Ortalyq Aziiadaǵy) eń iri memleket bolyp sanalady. Osy elmen qarym-qatynasty tereńdetý biz úshin qajet. Kórshimen bailanysty nyǵaitpai qalai ómir súrýge bolady?! Ekonomikalyq turǵyda paidaly, alysqa tasymaldaýdyń qajeti joq. 1 mlrd AQSh dollarǵa jetpei júrgen saýda-sattyǵymyz biyl 3 milliard bolady», - dedi Elbasy.
Osy oraida Memleket basshysy Ózbekstan Respýblikasynyń Prezidentimen telefon arqyly sóleskenin eske salyp, eki el arasyndaǵy yntymaqtastyq máseleleri talqylanǵanyn atap ótti.
«Biyl saýda kólemi 42 paiyzǵa artty. Biz 5 milliard AQSh dollaryna jetkizý maqsatyn qoiyp otyrmyz», - dedi N. Nazarbaev.
Prezidenttiń sózine qaraǵanda, eki el arasynda kóptegen salalardaǵy máseleler boiynsha ýaǵdalastyqqa qol jetkizý úshin múmkindik paida boldy. Qazirgi ýaqytta barlyq kólik túrlerimen ózara saparlaý úshin infraqurylym jasalyp jatyr.
«Qazaqstan men Qytai arasynda «Qorǵas» atty úlken keshen salynyp jatqanyn bilesizder. Sondai keshen Ózbekstan men Qazaqstan arasynda da bolady dep sanaimyn. Eki jaqtan óndiris jasap, ol jerde jańa qala paida bolýy múmkin», - dedi Memleket basshysy.
