ٶزبەكستان مەن قازاقستان اراسىندا جاڭا قالا پايدا بولۋى مٷمكٸن. بۇل تۋرالى جىل قورىتىندىسى بويىنشا ەلٸمٸزدٸڭ باق ٶكٸلدەرٸمەن كەزدەسۋ بارىسىندا قر پرەزيدەنتٸ نۇرسۇلتان نازارباەۆ مەلٸم ەتتٸ, دەپ حابارلايدى قازاقپارات.
«شاۆكات ميرزييوەۆ ٶزبەكستاننىڭ باسشىلىعىنا كەلگەننەن بەرٸ جاعداي مٷلدەم ٶزگەردٸ. ەل حالقىنىڭ سانى 33 ميلليوندى قۇرادى. بۇل, بٸزدٸڭ ارامىزداعى (ورتالىق ازيياداعى) ەڭ ٸرٸ مەملەكەت بولىپ سانالادى. وسى ەلمەن قارىم-قاتىناستى تەرەڭدەتۋ بٸز ٷشٸن قاجەت. كٶرشٸمەن بايلانىستى نىعايتپاي قالاي ٶمٸر سٷرۋگە بولادى?! ەكونوميكالىق تۇرعىدا پايدالى, الىسقا تاسىمالداۋدىڭ قاجەتٸ جوق. 1 ملرد اقش دوللارعا جەتپەي جٷرگەن ساۋدا-ساتتىعىمىز بيىل 3 ميلليارد بولادى», - دەدٸ ەلباسى.
وسى ورايدا مەملەكەت باسشىسى ٶزبەكستان رەسپۋبليكاسىنىڭ پرەزيدەنتٸمەن تەلەفون ارقىلى سٶلەسكەنٸن ەسكە سالىپ, ەكٸ ەل اراسىنداعى ىنتىماقتاستىق مەسەلەلەرٸ تالقىلانعانىن اتاپ ٶتتٸ.
«بيىل ساۋدا كٶلەمٸ 42 پايىزعا ارتتى. بٸز 5 ميلليارد اقش دوللارىنا جەتكٸزۋ ماقساتىن قويىپ وتىرمىز», - دەدٸ ن. نازارباەۆ.
پرەزيدەنتتٸڭ سٶزٸنە قاراعاندا, ەكٸ ەل اراسىندا كٶپتەگەن سالالارداعى مەسەلەلەر بويىنشا ۋاعدالاستىققا قول جەتكٸزۋ ٷشٸن مٷمكٸندٸك پايدا بولدى. قازٸرگٸ ۋاقىتتا بارلىق كٶلٸك تٷرلەرٸمەن ٶزارا ساپارلاۋ ٷشٸن ينفراقۇرىلىم جاسالىپ جاتىر.
«قازاقستان مەن قىتاي اراسىندا «قورعاس» اتتى ٷلكەن كەشەن سالىنىپ جاتقانىن بٸلەسٸزدەر. سونداي كەشەن ٶزبەكستان مەن قازاقستان اراسىندا دا بولادى دەپ سانايمىن. ەكٸ جاقتان ٶندٸرٸس جاساپ, ول جەردە جاڭا قالا پايدا بولۋى مٷمكٸن», - دەدٸ مەملەكەت باسشىسى.
