Foto: Gov.kz
Samarqand qalasynda ótip jatqan «Ózbekstan – Qazaqstan» IV óńiraralyq forýmyna Túrkistan oblysynyń delegatsiiasy da qatysyp, mańyzdy kelissózder júrgizdi. Iskerlik forým sheńberinde quny 352 mln. AQSh dollarynan asatyn 76 qujatqa qol qoiylsa, sonyń 68,2 mln. AQSh dollary kólemindegi kelisimder Túrkistan óńirine tiesili, dep habarlaidy Ult.kz.
Túrkistan oblysynyń ákimi Darhan Satybaldy ekonomikalyq jáne baýyrlastyq bailanystardyń mańyzyna toqtalyp, bul baǵyttaǵy jumystar qarqyndy jalǵasatynyn jetkizdi.
– Ózbekstan biz úshin baýyrlas memleket. Bizdi ortaq tarihymyz, tilderimiz ben mádenietimiz bailanystyrady. Túrkistan oblysynyń Ózbekstan Respýblikasymen taýar ainalymy 2023 jyly 421,9 mln. AQSh dollaryn qurady. Onyń ishinde eksport 253,2 mln. AQSh dollary bolsa, import 168,7 mln. AQSh dollaryna jetken. Eki memlekettiń basshylarynyń kezdesýindegi kelisimge sáikes, Túrkistan óńirinde toqyma klasterin qurý, iri qara maldyń etin óńdeý, jibek klasterin qurý baǵytynda jumys júrýde. Óńirde «Qazaqstan-Ózbekstan» jibek klasterin qurýdy usynamyz. «Ortalyq Aziia» halyqaralyq ónerkásiptik kooperatsiia ortalyǵyn iske asyrý baǵytynda bizdiń tarapymyzdan investor anyqtalyp, qurylys-montaj jumystary bastaldy. Sizderdi oblysymyzdyń investitsiialyq alańdarynda birlesken jobalardy iske asyrýǵa shaqyramyz. Aýyl sharýashylyǵynda terini, kókónisterdi, jemister men sút ónimderin óńdeý, maqta klasterin damytýǵ týrizm salasynda áriptestikti nyǵaitýdy usynamyz. Baýyrlas aimaqtar arasynda mádeni is-sharalar ótkizý de mańyzdy. Bul sharalar eki eldiń rýhani-mádeni bailanystaryn nyǵaityp, tájiribe almasýǵa oń áser etetinine senimdimin, – dedi Darhan Satybaldy.
Forýmda Darhan Satybaldy Tashkent jáne Samarqand oblystarynyń basshylarymen túrli salalar boiynsha áriptestik ornatý jónindegi kelisimge qol qoidy. Endi saýda-ekonomikalyq, mádeni-ǵylymi, gýmanitarlyq bailanystar budan saiyn nyǵaia túspek.
Sonymen birge forým aiasynda eki memlekettiń kásipkerleri men osy salaǵa jaýapty mekeme basshylarynyń kezdesýleri ótti. Túrkistan oblysy ákiminiń orynbasary Nuralhan Kósherov Syrdariia, Buhara, Namangan oblystary ákimderiniń orynbasarlarymen áriptestik jónindegi kelisimderge qol qoidy.
Ózbekstan men Qazaqstan kásipkerleri túrli formatta kezdesýler ótkizip, kelissózder júrgizdi. Túrkistan oblysynyń kásipkerleri balyq sharýashylyǵy, aýyl sharýashylyǵy, maqta sharýashylyǵy, týrizm, taamyshatyp sýarý, bilim salalary boiynsha jalpy 68,2 mln. AQSh dollary kólemindegi kelisimderge qol jetkizdi.
