Qazaqstanda órtengen avtobýsta qaza tapqan Ózbekstan azamattaryn alyp ketý úshin Tashkentten arnaiy reis ushyryldy, dep habarlaidy «QazAqparat» HAA tilshisi ÓR TJM-ne silteme jasap.
«Ushaq Tashkent ýaqytymen 15:00-de ushty. Ázirshe qaza tapqandar esimderiniń tolyq tizimi joq. Bul másele qazir Qazaqstan IIM jáne SIM-men birlese sheshilýde. Avtobýs Saryaǵash qalasynan Reseidiń Qazan bara jatqan», - delingen habarlamada.
Sonymen qatar Ózbekstan TJM baspasóz qyzmetindegiler olarda jol apatynda aman qalǵandar tizimi de joq ekenin aitty.
«Biz ázirshe aman qalǵandar tizimin alǵan joqpyz. Osy málimetti anyqtap jatyrmyz», - deidi baspasóz qyzmetindegiler.
Eske salaiyq, tótenshe jaǵdai Aqtóbeden 320 shaqyrym qashyqtyqta Qalybai kentinen 10 shaqyrym jerde «Samara-Shymkent» tasjolynda bolǵan.
Jedel shtabta belgili bolǵandai, avtobýs jolaýshylary Ózbekstannan Reseige kúnkóris qamymen bara jatqan. Onda Ózbekstannyń 54 azamaty men 3 qazaqstandyq bolǵan. Avtobýsta shyqqan órt saldarynan 52 ózbekstandyq qaza tapty. Tiri qalǵandardyń arasynda 3 qazaqstandyq jáne 2 ózbekstandyq bar. Olardy jeńil deńgeide kúiik shalǵan. Oqiǵanyń mán-jaiy tergeý amaldary barysynda anyqtalmaq. Osy oqiǵaǵa bailanysty arnaýly Úkimettik komissiia jasaqtaldy.
