Búgin Almatyda kórnekti memleket jáne qoǵam qairatkeri, belgili ǵalym Ózbekáli Jánibekovtiń týǵanyna 90 jyl tolýyna orai respýblikalyq ǵylymi-praktikalyq konferentsiia ótti, dep habarlaidy QazAqparat.
Ǵylymi konferentsiia barysynda O. Súleimenov, M. Joldasbekov, M. Jurynov, S. Tereshenko, Q. Sultanov syndy belgili qoǵam qairatkerleri sóz alyp, aitýly tulǵanyń eńbegi týraly estelikterimen bólisti.
«Ózbekáli Jánibekovtiń jasaǵan jumystaryn biz endi túsinip jatyrmyz. Onyń tikelei aralasýymen Alash arystary aqtalǵan edi. Bul ispen ol tynymsyz eńbek etti. Onyń arqasynda Shákárim, Maǵjan Jumabaev jáne t.b. esimderi elmen qaita qaýyshty. Mundai basshylar bizge kerek edi, búgin de kerek jáne árqashan qajet bolady. Sondyqtan da biz Ózbekáli Jánibekovti osy tiptegi basshy retinde únemi eske alamyz, dedi, - óz sózinde Qazaqstannyń Eńbek Eri Oljas Súleimenov.
Myrzatai Joldasbekov Ózbekáli Jánibekovpen birge jumys istegen kezderin eske aldy.
«Meni qasynan qaldyrmaityn, el aralap birge júrdik. Qazaqtyń oi-sanasy týraly aitqandy jaqsy kóretin. Sóilep ketse, keýdesi keńsarai edi. Ózi tarihshy, etnograf boldy. Birtalai kitaptar jazdy. Jany taza adam edi. Memleket múlkine esh qol suqpaǵan adam», - dedi ol.
Senat depýtaty Altynbek Nuhuly Arystan bab qoryq mýzeii mańyndaǵy jabylyp qalǵan Ózbekáli Jánibekov mýzeii tarihi-etnologiialyq sipatta qatarǵa qaita qosý, Túrkistan qalasynda keń kóshege esimin berip, eskertkishin ornatý, 5 tomdyq shyǵarmalar jinaǵyn tolyqtyryp jaryqqa shyǵarý jáne ómirinen derekti kino týyndylar jasaý, ózi oqyǵan Abai atyndaǵy Qazaq ulttyq pedagogikalyq ýniversitetinde Ózbekáli Jánibekov atyndaǵy aýditoriiany ashý, sondai-aq halyqaralyq ǵylymi-praktikalyq konferentsiia ótkizý týraly usynystaryn jetkizdi.
Alqaly jiyn barysynda Qanysh Sátbaevtyń memorialdyq murajaiy tarapynan QR Memlekettik muraǵatynan alynǵan qujattar men fotosýretter qoiylǵan Ózbekáli Jánibekovtiń ómiri men qairatkerlik qyzmetine qatysty kórme uiymdastyryldy. Olardyń qatarynda Búkilálemdik IýNESKO tizimine engen mádeni mura qujattarynyń kóshirmesi bar.
