Ózbekstan biligi elge "Taliban" qozǵalysynyń ideologiiasy kirip ketedi dep qoryqpaidy. Qozǵalystyń halyqaralyq qaýymdastyqpen aralasýy olardyń damýyna kómektesedi. Bul týraly Ózbekstan syrtqy ister ministri Abdýlaziz Kamilov Resei jýrnalisterine aitty, dep habarlaidy Azattyq.
Ministr 22 qazan kúni osy jóninde baspasóz máslihatyn ótkizdi. Oǵan "Pervyi kanal", "Rossiia 24", NTV telearnalary men TASS aqparat agenttiginiń, "Kommersant" jáne "Komsomolskaia pravda" gazetteriniń tilshileri qatysqan. Máslihat eki saǵatqa ulasty deidi Gazeta.uz basylymy.
Kezdesýde Ózbekstan aýmaǵynda tálip ideologiiasynyń taraý yqtimaldyǵy týraly suraq qoiyldy.
"Menińshe, "Talibannyń" aldynda turǵan mindetterdiń qatarynda siz aitqan másele turǵan joq. Olarǵa qazir aiaǵyna nyq turyp, qandai da bir memleket qurǵany, olardy moiyndaǵany qajet, – dedi ózbek syrtqy ister ministri. – Ideologiiasyn eksporttaityn dárejege jetkenshe kóp ýaqyt ketedi. Osy ýaqyt aralyǵynda qozǵalys evoliýtsiialanady dep úmittenemiz. Olar neǵurlym aimaq isine aralassa, soǵurlym halyqaralyq isterge aralasady jáne onda halyqaralyq quqyqqa súiený qajet bolady. Olar neǵurlym halyqaralyq qaýymdastyqta moiyndalǵanyn qalasa, soǵurlym qozǵalys pen onyń jetekshileriniń ideologiiasy, kózqarasy ózgeredi".
Ministrdiń sózinshe, "Ózbekstannyń ulttyq basymdyqtary men ulttyq ideiasy turǵanda tálip ideologiiasyna oryn joq".
"Mine, áielder qazirden oramal taǵa bastady, demek tálipter keledi deidi keide. Bul salystyratyn nárse me? Álemniń jartysy oramal taǵady, óitkeni ol – sán, solai emes pe? Sol sebepti biz búgin tálip ideologiiasy kirip ketedi dep qoryqpaimyz, – dedi Abdýlaziz Kamilov. – Tálipterdiń negizgi ideologiiasy óz elin sheteldikterden azat etý, bar bolǵany sol ǵana.
2021 jylǵy mamyrda Aýǵanstandaǵy shetel áskeri kete bastaǵanda, shabýylyn údetip, tamyzdyń ortasyna qaryp el astanasy Kabýlǵa kirdi de, tutas Aýǵanstandy baqylaýǵa alǵanyn málimdedi. Ózbek biligi "Talibandy" qujat júzinde moiyndamasa da, olarmen áriptestik ornatýǵa nietti ekenin bildirdi. Máselen, 7 qazan kúni Abdýlaziz Kamilov bastaǵan ózbek delegatsiiasy Aýǵanstanǵa saparlap, "Taliban" basshylyǵymen kelissóz júrgen. Al 16 qazan kúni Ózbekstannyń Termez qalasyna tálipterdiń delegatsiiasy keldi.
20 qazan kúni Máskeýde Ózbekstan prezidentiniń Aýǵanstan jónindegi arnaiy ýákili Ismatýlla Irgashev Tashkenttiń tálip biligin qandai jaǵdaida moiyndaitynyn aitty. Tashkent talaptarynyń biri – aýǵan qoǵamyndaǵy barlyq saiasi taraptyń qatysýymen qurylatyn úkimet.
