Ózbekstandyq senatorlar Qazaqstanmen aradaǵy áýe reisteriniń baǵasy qymbat ekenine alańdaýly, dep habarlaidy "Ult aqparat" Ózbekstan Respýblikasynyń Olii Májilis Senatynyń resmi saityna silteme jasap.
Áýe biletteriniń qymbattyǵyna bailanysty tiisti senatorlyq saýal Ózbekstannyń Monopoliiaǵa qarsy komitetiniń tóraǵasyna jiberildi.
«Búginde ushý ýaqyty 1 saǵat 10 minýt bolatyn Tashkent–Almaty baǵyty boiynsha bir baǵyttaǵy áýe biletiniń baǵasy 4 mln 700 myń sýmdy quraidy. Al ushý ýaqyty 3 saǵat 40 minýt bolatyn Tashkent–Máskeý baǵyty boiynsha aviabilettiń baǵasy 4 million 200 myń sým, Tashkent–Riga baǵyty boiynsha – 2 million 800 myń sým (ushý ýaqyty - 5 saǵat 30 minýt) jáne Tashkent – Niý-Iork baǵyty boiynsha 6 million 500 myń sým (ushý ýaqyty-12 saǵat). Bul rette ushaqtyń túrleri birdei», - delingen resmi saýalda.
Tiisti taldaý jáne halyqpen tikelei dialog negizinde depýtattar Qazaqstanmen aradaǵy áýe reisteriniń baǵasy tym joǵary ekenine alańdaýshylyq bildirdi.
«Kórip otyrǵanymyzdai, ushý ýaqyty 1 saǵat 10 minýt bolatyn Tashkent-Almaty baǵyty boiynsha bir baǵyttaǵy áýe biletiniń baǵasy birneshe saǵatqa uzaǵyraq ushatyn reisterge belgilengen baǵadan edáýir joǵary. Bul túsiniksiz jaǵdai, artyq shyǵyn shyǵarýǵa májbúr bolǵan azamattarymyz úshin qiyndyqtar týǵyzady», - dep atap ótti ózbek senatorlary.
