Ózbekstanda oqýshy qyzdarǵa aq ne ashyq tústi oramal taǵýǵa jáne taqiia kiiýge ruqsat berildi. Bilim ministri Sherzod Shermatov bul sharanyń maqsaty barlyq balaǵa bilim berý dedi.
Bul týraly ózbek bilim ministri 4 qyrkúiek kúni bolǵan ashyq dialog kezinde aitty.
"Kóptegen ata-ananyń ótinishin eskere otyryp, qyzdarymyzǵa osy oqý jylynan bastap mektepte aq nemese ashyq tústi ulttyq oramal taǵyp, taqiia kiip júrýge ruqsat etpekpiz" dedi Ózbekstan bilim ministri Sherzod Shermatov.
Ministrdiń sózinshe, qyzdarǵa jaǵasy uzyn kóilek kiiýge de ruqsat berilmek. Biraq Shermatov muny qandai zańǵa súienip júzege asyratynyn aitpady.
Ózbekstan ministrler kabinetiniń 2018 jylǵy 15 tamyzdaǵy qaýlysynyń ("Memlekettik orta mektep oqýshylaryn zamanaýi mektep formasymen qamtamasyz etý týraly") 7-tarmaǵyna sáikes, oqý orny ishinde oqýshylar bas kiiminsiz júrýi tiis.
Kezinde bul qaýlynyń qabyldanýy din jolyn ustanatyn ata-analardyń narazylyǵyn týdyrǵan. Olar oramal taqqan qyzdarynyń mektepke kire almai qalǵanyn aityp shaǵynǵan. Ol kezde buǵan Sherzod Shermatov mynadai jaýap qatqan:
"Kóbi oramal men hidjab týraly aitady. Biraq qazir bul basty mindet emes. Bizdiń negizgi mindetimiz – jaqsy bilim men tálim alǵan urpaqty ósirý. Adamdardyń basy ekinshi deńgeili máselege qatyp otyr".
Osynyń aldynda Azattyqtyń Ózbek qyzmetine suhbat bergen ata-ananyń biri biryńǵai mektep formasyn talap etý sabaqtyń úzdiksiz toqtai berýine ákelip, bilim sapasyna teris áser etip otyr degen.
Ózbekstanda jańa oqý jyly 6 qyrkúiekte bastalady.
